വിഴിഞ്ഞം തുറമുഖത്തിന്‍റെ പേരിൽ മാറ്റം; ലോഗോ കീർത്തിമുദ്രയെന്ന്​ മുഖ്യമന്ത്രി

തിരുവനന്തപുരം: വിഴിഞ്ഞം അന്താരാ​ഷ്ട്ര തുറമുഖത്തിന്റെ പുതിയ പേരും ലോഗോയും ​മുഖ്യമന്ത്രി പിണറായി വിജയൻ പ്രകാശനം ചെയ്തു. വിഴിഞ്ഞം ഇന്റർനാഷനൽ സീപോർട്ട് തിരുവനന്തപുരം എന്ന പേരിലാണ്​ ഇനി തുറമുഖം അറിയപ്പെടുക. ‘വി’ എന്ന ഇംഗ്ലീഷ് അക്ഷരത്തിനകത്തേക്ക്​ കപ്പൽ കയറിവരുന്ന തരത്തിലാണ്​ ലോഗോ. ഇത്​ തുറമുഖത്തിന്റെ കീർത്തിമുദ്രയായി തിളങ്ങട്ടെയെന്ന്​ മുഖ്യമന്ത്രി ആശംസിച്ചു. കേരളത്തിന്റെ സ്വപ്നപദ്ധതിയായ തുറമുഖം യാഥാർഥ്യമാകുന്നതോടെ അന്താരാഷ്ട്ര മറൈൻ ട്രാൻസ്ഷിപ്മെന്റ് രംഗത്ത്​ അനന്ത സാധ്യതകൾ തുറക്കും. ഒക്​ടോബർ ആദ്യവാരം പ്രഥമ ചരക്കുകപ്പൽ വിഴിഞ്ഞം തുറമുഖത്തെത്തുന്നത്​ എല്ലാ മലയാളികളെയും ആഹ്ലാദിപ്പിക്കുമെന്ന്​ അദ്ദേഹം പറഞ്ഞു.

മന്ത്രി അഹമ്മദ് ദേവർകോവിൽ അധ്യക്ഷത വഹിച്ചു. വിഴിഞ്ഞം യാഥാർഥ്യമാകുന്നതോടെയുണ്ടാകുന്ന വ്യവസായ, ടൂറിസം സാധ്യതകൾ സർക്കാർ സമഗ്രമായി പരിശോധിച്ച്​ നടപ്പാക്കുകയാണെന്ന്​ തുറമുഖത്തിന്റെ വെബ്സൈറ്റും സോഷ്യൽ മീഡിയ ചാനലുകളും പ്രകാശനം ചെയ്ത്​ മന്ത്രി പി. രാജീവ് പറഞ്ഞു. കേരളത്തിൽ പലയിടത്തും ലോജിസ്റ്റിക് പാർക്ക് ആരംഭിക്കാമെന്ന്​ അദാനി വാഗ്ദാനം നൽകിയിട്ടുണ്ടെന്ന്​ അദ്ദേഹം സൂചിപ്പിച്ചു. തുറമുഖ വകുപ്പ് പ്രിൻസിപ്പൽ സെക്രട്ടറി കെ.എസ്. ശ്രീനിവാസ്, വിഴിഞ്ഞം ഇന്റർനാഷനൽ സീപോർട്ട് മാനേജിങ് ഡയറക്ടർ ഡോ. അദീല അബ്ദുല്ല, അദാനി വിഴിഞ്ഞം പോർട്ട് മാനേജിങ് ഡയറക്ടർ രാജേഷ് ഝാ, മുൻ മന്ത്രി എം. വിജയകുമാർ, എം. വിൻ​സന്‍റ്​ എം.എൽ.എ എന്നിവരും പങ്കെടുത്തു. പോർട്ടിന്​ മുൻ മുഖ്യമന്ത്രി ഉമ്മൻ ചാണ്ടിയുടെ പേര്​ നൽകണമെന്ന്​ നേരത്തേ ആവശ്യമുന്നയിച്ച എം. വിൻ​സന്‍റ് നെഞ്ചിൽ അദ്ദേഹത്തിന്‍റെ ചിത്രം കുത്തിയാണ്​ പ​ങ്കെടുത്തത്​.