ccc

തീവ്രവാദവും വർഗീതയും എവിടെയും നേട്ടമുണ്ടാക്കിയിട്ടില്ലെന്നത്​ ചരിത്രപാഠം -സാദിഖലി ശിഹാബ്​തങ്ങൾ തിരുവനന്തപുരം: തീവ്രവാദവും വർഗീയതയും വിഭാഗീതയും എവിടെയും നേട്ടമുണ്ടാക്കിയിട്ടില്ലെന്നാണ്​ ചരിത്രമെന്നും അത്തരം നീക്കങ്ങളെ അനുകൂലിക്കുന്നവർ ഏറ്റവും വലിയ വർഗീയവാദികളാണെന്നും മുസ്​ലിം ലീഗ്​ സംസ്ഥാന പ്രസിഡന്‍റ്​ പാണക്കാട്​ സാദിഖലി ശിഹാബ്​ തങ്ങൾ. അത്തരം നീക്കങ്ങളെ തള്ളിപ്പറയുന്നവർ ഏറ്റവും വലിയ മനുഷ്യസ്​നേഹിയാകും. ഇതിൽ മനുഷ്യസ്​നേഹികളായി മാറാൻ ഓരോരുത്തരും വ്യക്തിപരമായി തീരുമാനമെടുക്കണമെന്നും തങ്ങൾ പറഞ്ഞു. മുസ്​ലിം ലീഗ്​ ജില്ല പ്രവർത്തക കൺവെൻഷൻ ഉദ്​ഘാടനം ചെയ്യുകയായിരുന്നു അദ്ദേഹം. വിശ്വാസത്തിന്‍റെയും മതത്തിന്‍റെയും പേരിൽ ദുഷ്ടലാക്കോടെ പ്രവർത്തിക്കുന്ന ചെറിയവിഭാഗമുണ്ട്​. അത്തരം നീക്കങ്ങളെ നിരാകരിക്കുകയും വെറുക്കുകയും വേണം. സാഹോദര്യത്തിനും സഹിഷ്ണുതക്കും പകരം വെറുപ്പ്​ പ്രചരിപ്പിക്കാനുള്ള ശ്രമമാണ്​ രാജ്യത്ത്​ നടക്കുന്നത്​. അതുവഴി ഇന്ത്യയുടെ വളർച്ചയുടെ ഗ്രാഫ്​ താഴോട്ടാണ്​ പോകുന്നത്​. വൈവിധ്യങ്ങളെ അംഗീകരിക്കുന്നതിനു​ പകരം അവയെ അകറ്റി നിർത്താനുള്ള ശ്രമം നടക്കുന്നു. എല്ലാവരും ഒരേ രീതിയിൽ ചിന്തിച്ചാൽ മതിയെന്നും ഒരേ ഭക്ഷണവും വസ്ത്രവും മതിയെന്നും പറയുന്ന സമീപനം രാജ്യത്തിന്‍റെ ആത്മാവിനെതന്നെ നഷ്ടപ്പെടുത്തുന്നതാണെന്നും സാദിഖലി ശിഹാബ്​തങ്ങൾ പറഞ്ഞു. രാജ്യത്ത്​ വിവിധ ജനവിഭാഗങ്ങൾക്കിടയിൽ വർഗീയതയും വിഭാഗീയതയും പ്രചരിപ്പിച്ച്​ അതിൽനിന്ന്​ മുതലെടുക്കാനുള്ള ശ്രമമാണ്​ നടക്കുന്നതെന്ന്​ മുഖ്യപ്രഭാഷണം നടത്തിയ മുസ്​ലിം ലീഗ്​ ദേശീയ ജനറൽ സെക്രട്ടറി പി.കെ. കുഞ്ഞാലിക്കുട്ടി പറഞ്ഞു​. ഭൂരിപക്ഷ, ന്യൂനപക്ഷ വിഭാഗങ്ങൾക്കിടയിൽ വർഗീയത വളർത്താൻ ബോധപൂർവമായ ശ്രമം നടക്കുന്നു. കുട്ടികളെകൊണ്ട്​ അനാവശ്യമായ മുദ്രാവാക്യം വിളിപ്പിക്കുന്നവർ എന്തു​ സംസ്കാരമാണ്​ ഇവിടെ വളർത്താൻ ശ്രമിക്കുന്നത്​. ആളുകളെ കൊലക്ക്​ കൊടുക്കുന്നതും മനുഷ്യത്വമില്ലാത്തതും മതം വിലക്കിയതുമായ ഇത്തരം ശ്രമങ്ങളെ കർശനമായി പ്രതിരോധിക്കണം. കോവിഡ്​ കാലത്ത്​ കിറ്റ്​ നൽകി രണ്ടാമതും അധികാരത്തിൽ വന്നവർ ആർക്കും വേണ്ടാത്ത കെ-റെയിലിനു​വേണ്ടി മറ്റുള്ളവരുടെ അടുക്കളയിൽ പോയി മഞ്ഞക്കുറ്റി അടിക്കുകയാണെന്നും കുഞ്ഞാലിക്കുട്ടി കുറ്റപ്പെടുത്തി. ദേശീയ ഓർഗനൈസിങ്​ സെക്രട്ടറി ഇ.ടി. മുഹമ്മദ്​ ബഷീർ എം.പി, സംസ്ഥാന ജനറൽ സെക്രട്ടറി പി.എം.എ. സലാം, എം.എൽ.എമാരായ കെ.കെ. ആബിദ്​ ഹുസൈൻ തങ്ങൾ, ടി.വി. ഇബ്രാഹിം, എൻ. ഷംസുദ്ദീൻ, കുറുക്കോളി മൊയ്തീൻ, വനിത ലീഗ്​ സംസ്ഥാന പ്രസിഡന്‍റ്​ സുഹ്​റ മമ്പാട്​, ലീഗ്​ ജില്ല പ്രസിഡന്‍റ്​ തോന്നയ്​ക്കൽ ജമാൽ, സെക്രട്ടറി പാച്ചല്ലൂർ നജ്​മുദ്ദീൻ, അബ്​ദുറഹിമാൻ രണ്ടത്താണി, യു.സി. രാമൻ, എം. റഹ്​മത്തുല്ല, അബ്​ദുറഹ്​മാൻ കല്ലായി, സി.പി. ബാവഹാജി എന്നിവർ സംസാരിച്ചു.