മൂന്ന്​ തലമുറയുടെ അധ്യാപക​ന്​ വിട നൽകി ശിഷ്യസമൂഹം

ബാലരാമപുരം: ആയിരക്കണക്കിന് ശിഷ്യഗണങ്ങളുള്ള പ്രിയ അധ്യാപക​െൻറ വിടവാങ്ങൽ ഒരുപ്രദേശത്തെയാകെ ദുഃഖത്തിലാഴ്ത്തി.

അഞ്ചര പതിറ്റാണ്ടോളം ബാലരാമപുരത്തെയും പരിസര പ്രദേശങ്ങളിലെയും വിദ്യാർഥികൾക്ക് അക്ഷര വെളിച്ചം പകർന്ന ബാലരാമപുരം യൂനിയൻ കോളജ് സ്ഥാപകനും മാനേജരും പ്രിൻസിപ്പലുമായിരുന്ന എം.എം. ഇസ്​മായിലിന് (75) വിദ്യാർഥി സമൂഹം കണ്ണീരോടെ അന്ത്യാഞ്ജലിയർപ്പിച്ചു. കോവിഡ് ബാധിതനായി ചികിത്സയിൽ കഴിയവെ, ഇന്നലെ പുലർച്ചയായിരുന്നു അന്ത്യം. പതിനഞ്ചാം വയസ്സിലാരംഭിച്ചതാണ് ഇസ്​മായിലി​െൻറ അധ്യാപന വൃത്തി.

ഇതിനിടെ കണ്ടക്ടറായി ജോലി ലഭിച്ചു. എന്നാൽ, അധ്യാപനത്തോടുള്ള താൽപര്യം കാരണം ജോലി ഉപേക്ഷിച്ച് പാരലൽ കോളജ്​ അധ്യാപകനായി തുടർന്നു.

1967ൽ ആരംഭിച്ച അദ്ദേഹത്തി​െൻറ സ്ഥാപനത്തിൽ പഠിക്കുന്ന ഒരു വിദ്യാർഥിയെങ്കിലും ഇല്ലാത്ത വീടുകൾ ഒരു കാലത്ത്​ കുറവായിരുന്നു.

ഗണിതം, ഇംഗ്ലീഷ് ഗ്രാമർ വിഷയങ്ങളായിരുന്നു ഇസ്​മായിൽ നേരിട്ട് കൈകാര്യം ചെയ്തിരുന്നത്. ഏറെ പ്രയാസമുള്ള ഇരു വിഷയങ്ങളും എളുപ്പത്തിൽ ഹൃദിസ്ഥമാക്കാൻ ചില കുറുക്കുവഴികളും അ​ദ്ദേഹത്തിന​ുണ്ടായിരുന്നു.

സാമ്പത്തികമായി പിന്നാക്കം നിൽക്കുന്ന വിദ്യാർഥികൾക്ക് സൗജന്യ പഠനാവസ​രമൊരുക്കി. ഇസ്​മായിലി​െൻറ നിര്യാണത്തിൽ നിയുക്ത എം.എൽ.എ എം. വിൻസൻറ്​ അനുശോചിച്ചു. നിരവധി വ്യക്തികളും സംഘടനകളും അനുശോചനം അറിയിച്ചു.