അമ്മയുടെ മൃതദേഹത്തിനരികിൽ വിതുമ്പലോടെ മക്കൾ

ബാലരാമപുരം: കളിക്കോപ്പുമായി എത്തുമെന്നറിയിച്ച് മക്കളോട് യാത്ര പറഞ്ഞ് പോയ മാതാവിെൻറ മൃതദേഹത്തിനരികിൽ വിതുമ്പലോടെ രണ്ട് മക്കളും ബന്ധുക്കളും. നജ്റാനിൽ അപകടത്തിൽ മരിച്ച അവണാകുഴി താന്നിമൂട് 'ഹരേ രാമ'ഹൗസിൽ അശ്വതി വിജയ​െൻറ മൃതദേഹം ഞായറാഴ്ചയാണ്​ വീട്ടിലെത്തിച്ചത്.

ആറുവയസ്സുകാരി ദിക്ഷയും നാലുവയസ്സുകാരൻ ദയാലും കരഞ്ഞത് ബന്ധുക്കളെയും കൂടിനിന്നവരെയും കണ്ണീരിലാഴ്ത്തി. എല്ലാ ദിവസവും ഡ്യൂട്ടികഴിഞ്ഞെത്തിയാൽ മക്കളെ വിളിച്ച് വിവരങ്ങൾ അന്വേഷിച്ച ശേഷ​േമ അശ്വതി കിടക്കാറുള്ളൂ. മരിക്കുന്നതിന് മണിക്കൂറുകൾക്ക് മുമ്പും മക്കളെ വിളിച്ച് സംസാരിച്ച ശേഷമാണ് അശ്വതി വിജയൻ യാത്രപോയത്. കൂട്ടുകാരിക്കൊപ്പം സാധനങ്ങൾ വാങ്ങാനായി പുറത്ത് പോകുന്നതായി ഭർത്താവ്​ ജിജോഷ് മിത്രയെ വിളിച്ചറിയിച്ച ശേഷമാണ് പോയത്.

തിരുവനന്തപുരത്തെ സ്വകാര്യ ആശുപത്രിയിൽ നഴ്സിങ്​ പഠനം കഴിഞ്ഞ ശേഷം തിരുവന്തപുരത്തെ സ്വകാര്യ ആശുപത്രിയിലും നഴ്സായി ജോലി നോക്കിയിരുന്നു. രണ്ട് വർഷത്തിലെറെയായി സൗദിയിലെ നജ്റാനിലെ കിങ്​ ഖാലിദ് സർക്കാർ ആശുപത്രിയിൽ ജോലി നോക്കി വരുകയായിരുന്നു. മൂന്ന് മാസം മുമ്പ് നാട്ടിലെത്തി മടങ്ങിയിരുന്നു.

അടുത്ത വരവിന് കുട്ടികൾ ആവശ്യപ്പെടുന്ന കളിക്കോപ്പുകളും വാങ്ങി വരുമെന്നും മക്കളെ വിളിക്കുമ്പോൾ അശ്വതി പറഞ്ഞിരുന്നു. മക്കളെ ജീവന് തുല്യം സ്​നേഹിച്ചിരുന്ന അശ്വതി മക്കളെ വിളിക്കാത്ത ദിവസങ്ങളും ചുരുക്കമാണ്. നിരവധി മോഹങ്ങൾ ബാക്കിയാക്കി അശ്വതിയുടെ അവസാന യാത്ര. ഞായറാഴ്ച ഒരുമണിക്കൂറിലേറെ വീട്ടിൽ ​െവച്ച മൃതദേഹം സംസ്​കരിച്ചു.