197 ​പുതിയ കോഴ്​സുകൾ; കോളജുകളിലും സർവകലാശാലകളിലും 7500 സീറ്റ്​ കൂടും

തിരുവനന്തപുരം: പ്രധാന കോളജുകളിലും സർവകലാശാലകളിലും ഉൾപ്പെടെ അഞ്ചു​വർഷ ഇൻറഗ്രേറ്റഡ്​ പി.ജി ഉൾപ്പെടെ 197 കോഴ്​സ്​ അനുവദിച്ച്​ സർക്കാർ ഉത്തരവ്​. സർക്കാർ, എയ്​ഡഡ്​ കോളജുകളിലും എൻജിനീയറിങ്​ കോളജുകളിലും സർവകലാശാലകളിലുമായാണ്​ പുതുതലമുറ കോഴ്​സുകൾ ഉൾപ്പെടെ അനുവദിച്ചത്​​. 47 സർക്കാർ കോളജുകളിൽ 49 ഉം 105 എയ്​ഡഡ്​ കോളജുകളിൽ 117ഉം കോഴ്​സ്​​ അനുവദിച്ചു. എട്ട്​ സർവകലാശാലകളിൽ 19 ഉം എട്ട്​ എൻജിനീയറിങ്​ കോളജുകളിൽ 12ഉം കോഴ്സ്​ അനുവദിച്ചു. ഇതുവഴി 7500 സീറ്റ്​ വർധിക്കും. മുഖ്യമന്ത്രിയുടെ 100 ദിന പരിപാടിയിൽ ഉൾപ്പെടുത്തിയാണ്​ കോഴ്​സുകളുടെ ​അനുമതി. പുതുതലമുറ കോഴ്​സുകൾ ആരംഭിക്കുന്നതിന്​ റിപ്പോർട്ട് സമർപ്പിക്കാൻ എം.ജി സർവകലാശാല വൈസ്​ ചാൻസലർ പ്രഫ. സാബുതോമസി​ൻെറ നേതൃത്വത്തിൽ സമിതിയെ സർക്കാർ നിയോഗിച്ചിരുന്നു. സമിതി ശിപാർശ പരിഗണിച്ച്​ കോളജുകളിൽനിന്ന്​ പുതിയ കോഴ്​സുകൾക്ക്​ അപേക്ഷ ക്ഷണിച്ചു. നാക് അക്രഡിറ്റേഷനിൽ നിശ്ചിത ഗ്രേഡ് ലഭിച്ച കോളജുകൾക്കാണ് സർവകലാശാലകളുടെ ശിപാർശയുടെ അടിസ്ഥാനത്തിൽ കോഴ്സ്​ അനുവദിച്ചത്. ദേവസ്വം ബോർഡ് കോളജുകൾ, എസ്.സി/എസ്.ടി വിഭാഗം നടത്തുന്ന കോളജുകൾ, സർക്കാർ കോളജുകൾ എന്നിവക്ക്​ നാക് നിബന്ധന ബാധകമാക്കിയില്ല. ദേവസ്വം ബോർഡ്, എസ്.സി/എസ്.ടി വിഭാഗം എന്നിവർ നടത്തുന്ന എല്ലാ കോളജിനും പുതിയ കോഴ്സ്​ അനുവദിച്ചിട്ടുണ്ട്. നാനോ സയൻസ്, സ്​പേസ് സയൻസ്, ഇക്കണോമെട്രിക്സ്, ബിസിനസ് ഇക്കണോമിക്സ്, ഫിനാൻഷ്യൽ മാർക്കറ്റിങ്​, സ്‌പോർട്സ് മാനേജ്മൻെറ്​, ഇൻറർനാഷനൽ റിലേഷൻസ്, സെയിൽസ് മാനേജ്മൻെറ്​, മൾട്ടിമീഡിയ ആൻഡ്​​ കമ്യൂണിക്കേഷൻ, ക്ലിനിക്കൽ സൈക്കോളജി, റിന്യൂവബിൾ എനർജി, കമ്പ്യൂട്ടേഷനൽ ബയോളജി, മ്യൂസിയോളജി, താരതമ്യപഠനം, ഡേറ്റാ അനാലിസിസ് തുടങ്ങിയ പുതുതലമുറ കോഴ്സുകളോടൊപ്പം പരമ്പരാഗത കോഴ്സുകളും അനുവദിച്ചിട്ടുണ്ട്. സർവകലാശാലകൾക്കും കോളജുകൾക്കും ഇത്രയധികം കോഴ്സ്​ അനുവദിക്കുന്നത് ആദ്യമാണ്. ഈ അധ്യയനവർഷം തന്നെ പ്രവേശനം നടത്തി ക്ലാസ്​ ആരംഭിക്കും. ഗുണമേന്മയുള്ള ഉന്നതവിദ്യാഭ്യാസം എല്ലാവർക്കും ലഭ്യമാക്കുകയാണ്​ സർക്കാർ ലക്ഷ്യമെന്ന്​ ഉന്നതവിദ്യാഭ്യാസ മന്ത്രി ഡോ. കെ.ടി. ജലീൽ അറിയിച്ചു. ഗസ്​റ്റ്​ അധ്യാപകരെ നിയമിച്ചായിരിക്കും പുതിയ കോഴ്​സുകൾ ആരംഭിക്കുക.