സംസ്ഥാനത്ത്​ 400 മെഗാവാട്ട്​ വൈദ്യുതി കുറവ്​; പുറത്തേക്കുള്ള വൈദ്യുതി വിൽപനക്ക്​ നിയന്ത്രണം

തിരുവനന്തപുരം: സംസ്ഥാനത്ത്​ കഴിഞ്ഞ രണ്ട്‌ ദിവസമായി ഉയർന്ന ഉപയോഗസമയമായ വൈകീട്ട്‌ ആറിനും 11നും ഇടയിൽ 400 മെഗാവാട്ട്‌ വൈദ്യുതിയുടെ കുറവ്‌. രാജ്യത്തെ 40 ഓളം താപവൈദ്യുതി നിലയങ്ങളിൽ കൽക്കരിയുടെ താൽക്കാലിക കുറവ്​ നിമിത്തം പീക്ക് സമയത്ത് തത്സമയ നിരക്കുകൾ ക്രമാതീതമായി വർധിച്ചിരിക്കുന്ന സാഹചര്യത്തിലാണ്​ സംസ്ഥാനത്തും വൈദ്യുതിയുടെ കുറവ് അനുഭവപ്പെടുന്നത്​. ഫുൾ ടൈം ഡയറക്ടർ ബോർഡ് യോഗമാണ്​ ഇക്കാര്യം അറിയിച്ചത്​. നിലവിൽ മധ്യപ്രദേശ്, ഹരിയാന, ഝാർഖണ്ഡ്, ജമ്മു-കശ്മീർ, മഹാരാഷ്ട്ര, രാജസ്ഥാൻ, ഉത്തർപ്രദേശ്, ഉത്തരാഖണ്ഡ്, ആന്ധ്രപ്രദേശ് തുടങ്ങിയ സംസ്ഥാനങ്ങൾ നേരിടുന്ന വൈദ്യുതി പ്രതിസന്ധി കെ.എസ്.ഇ.ബിയെ അത്രകണ്ട് ബാധിച്ചില്ലെങ്കിലും വോൾട്ടേജ് നിയന്ത്രണം വഴിയും വിതരണനിയന്ത്രണം ഏർപ്പെടുത്തിയും രണ്ട്​ ദിവസമായി സംസ്ഥാനത്തിന്‍റെ കുതിച്ചുയരുന്ന വൈദ്യുതി ഉപഭോഗം നിയന്ത്രണവിധേയമാക്കിയിട്ടുള്ളതാണ്. ഇടവപ്പാതിയുടെ ആദ്യമഴ ലഭ്യത 20 ശതമാനം ദുർബലമായിരിക്കുമെന്ന മുന്നറിയിപ്പിന്‍റെ പശ്ചാത്തലത്തിൽ സംസ്ഥാനത്തിന്‌ പുറത്തേക്കുള്ള വൈദ്യുതി വിൽപന നിയന്ത്രിക്കാനും തീരുമാനിച്ചു. കോഴിക്കോട് നല്ലളം ഡീസൽ താപനിലയത്തിൽ ഇന്ധനം ശേഖരിച്ചുെവക്കാനും കായംകുളം താപവൈദ്യുതി നിലയത്തിൽ നിന്ന്​ അടിയന്തരഘട്ടത്തിൽ വൈദ്യുതി ഷെഡ്യൂൾ ചെയ്യുവാനാകുമോ എന്ന്​ പരിശോധിക്കാനും കെ.എസ്.ഇ.ബി.എൽ, എൻ.ടി.പി.സിയോട് അഭ്യർഥിച്ചിട്ടുണ്ട്​. വൈദ്യുതി ബോർഡിലെ ഉദ്യോഗസ്ഥരുടെ എല്ലാവിധ സമരങ്ങൾക്കും നിയന്ത്രണം ഏർപ്പെടുത്തിയ ഹൈകോടതി വിധി യോഗം പരിശോധിച്ചു. നിലവിൽ അവശ്യസേവന നിയമം പ്രയോഗിക്കേണ്ട സാഹചര്യം ഇ​െല്ലന്നും വിലയിരുത്തി.