​ടി.കെ.എം സപ്ലി 4

120 ടു 16000 മൂന്ന്​ ബാച്ചുകളും 120 വിദ്യാർഥികളുമായി തുടങ്ങിയ ചരിത്രം ഇന്ന്​ സ്വയംഭരണവും 16000ൽപരം വിദ്യാർഥികളിലും എത്തിയ കഥയാണ്​ ടി.കെ.എം കോളജ്​ ട്രസ്റ്റിന്‍റേത്​. 1958 ജൂലൈ മൂന്നിന്​ അന്നത്തെ കേന്ദ്രമന്ത്രി പ്രഫ. ഹുമയൂൺ കബീർ ഉദ്​ഘാടനം ചെയ്ത എൻജിനീയറിങ്​ കോളജിൽ സിവിൽ, മെക്കാനിക്കൽ, ഇലക്​ട്രിക്കൽ എന്നീ ബ്രാഞ്ചുകളാണ്​ ഉണ്ടായിരുന്നത്​. ഇന്ന്​ എൻജിനീയറിങ്ങും ആർകിടെക്​ചറിലുമായി എട്ട്​ ഡിഗ്രി കോഴ്​സുകളും വിവിധ എൻജിനീയറിങ്​ സ്​പെഷലൈസേഷനുകളിലായി 10 ബിരുദാനന്തര കോഴ്​സുകളും എം.സി.എ പ്രോഗ്രാമും കോളജിലുണ്ട്​. നാക്​ അക്രഡിറ്റേഷനിൽ എ ഗ്രേഡിന്‍റെ തലയെടുപ്പ്​. നാഷനൽ ബോർഡ്​ ഓഫ്​ അക്രഡിറ്റേഷന്‍റെ ആറു വർഷത്തെ അക്രഡിറ്റേഷൻ സ്വന്തമാക്കിയ മികവ്​ സിവിൽ, മെക്കാനിക്കൽ ബ്രാഞ്ചുകൾക്ക്​ സ്വന്തം. 150 ഓളം ഗവേഷകരാണ്​ കോളജിന്‍റെ കരുത്തായുള്ളത്​. നിലവിലെ ഐ.എസ്​.ആർ.ഒ ചെയർമാൻ എസ്​. സോമനാഥ്​ വരെ പൂർവവിദ്യാർഥികളുടെ നിരയിലുള്ള കോളജിന്​ യു.ജി.സിയുടെ സ്വയംഭരണാവകാശം ലഭിച്ചത്​ മികവിനുള്ള ഏറ്റവും വലിയ അംഗീകാരമാണ്​. ആർട്​സ്​ ആൻഡ്​ സയൻസ്​ കോളജിന്‍റെ കഥയും സമാനമാണ്​. പ്രീഡിഗ്രിയും 120 കുട്ടികളുമായി തുടക്കം. ഇപ്പോൾ 11 ഡിഗ്രി കോഴ്​സുകളും ആറ്​ പി.ജി. കോഴ്​സുകളും കൂടാതെ റിസർച് സെന്‍ററിന്‍റെ തലത്തിലേക്കും​ വളർന്നു​. എൻ.ഐ.ആർ.എഫ്​ റാങ്കിങ്ങിൽ 45ാം സ്ഥാനം വരെ നേടിയിട്ടുണ്ട്​. നിലവിലെ ബി++ റാങ്കിങ്​ നാകിന്‍റെ ഏറ്റവും പുതിയ വിലയിരുത്തലിൽ എ പ്ലസ്​ ഗ്രേഡ്​ ആകുമെന്ന പ്രതീക്ഷയിലാണ്​ കോളജ്​. രണ്ട്​ സ്കൂളുകൾ കൂടാതെ, ഉന്നത വിദ്യാഭ്യാസ രംഗത്ത്​ മികവേറ്റുന്ന അഞ്ച്​ സ്ഥാപനങ്ങളും കൂടി ചേരുന്നതാണ്​ ടി.കെ.എം കുടുംബം. വിദേശ സർവകലാശാലകളുമായി ഒത്തുചേർന്നുള്ള പഠനാനുഭവങ്ങളും ടി.കെ.എമ്മിന്‍റെ വിദ്യാഭ്യാസനിലവാരത്തെ ലോകോത്തരമാക്കുന്നു. കൂടുതൽ സ്ഥാപനങ്ങളുമായി മറ്റ്​ സ്ഥലങ്ങളിലേക്കും വളരുന്ന ഭാവിയാണ്​ ടി.കെ.എം ട്രസ്റ്റ്​ മുന്നിൽകാണുന്നത്​. ...............................​ നാടിനൊപ്പം നിൽക്കുന്ന വിദ്യാർഥി ശൃംഖല അക്കാദമിക രംഗത്തെ ടി.കെ.എമ്മിന്‍റെ മികവിന്​ ലോകമെങ്ങും നിറയുന്ന അടയാളങ്ങളാണ്​ ഇവിടത്തെ പൂർവവിദ്യാർഥികൾ. കോളജിൽനിന്ന്​ തങ്ങൾക്ക്​ ലഭിച്ച മൂല്യങ്ങൾ സമൂഹത്തിനും പകർന്നുനൽകാനുള്ള പ്രവർത്തനങ്ങളിൽ ഒരു കുറവും അവർ വരുത്താറില്ല. ഫോർമർ സ്റ്റുഡന്‍റ്​ അസോസിയേഷൻ എന്ന പേരിൽ ഡോ. അബ്ദുൽ മജീദ് ലബ്ബ ചെയർമാനും പ്രഫ. എ.എ. കരീം സെക്രട്ടറിയുമായി 1990ൽ ആണ് ടി.കെ.എം കോളജ് ഓഫ് ആർട്​സ്​ ആൻഡ്​ സയൻസ് അലുമ്നി അസോസിയേഷൻ പിറവിയെടുത്തത്​. അക്ഷരാർഥത്തിൽ കോളജും സമൂഹവും തമ്മിലുള്ള പാലമായാണ് അസോസിയേഷൻ നിലകൊള്ളുന്നത്. കോളജിന് എക്കാലവും എടുത്തുകാട്ടാവുന്ന പ്രവർത്തനങ്ങളാണ് അലുമ്നി അസോസിയേഷന്‍റെ നേതൃത്വത്തിൽ നടപ്പാക്കുന്നത്​. അർഹരായ വിദ്യാർഥികൾക്ക് മെറിറ്റ് സ്കോളർഷിപ്പുകൾ, സാമ്പത്തികമായി ദുർബലരായ വിദ്യാർഥികളുടെ കുടുംബങ്ങളെ ഏറ്റെടുക്കൽ, നിർധനർക്ക് വീട് നിർമിച്ചു നൽകൽ, സ്ഥാപനത്തിന് ചുറ്റുമുള്ള സമൂഹത്തിലെ അർഹർക്ക് സഹായം നൽകൽ എന്നിങ്ങനെയുള്ള പ്രവർത്തനങ്ങളിൽ എന്നും മുന്നിലുണ്ട്​. പ്രളയ സാഹചര്യത്തിൽ രണ്ടു ലക്ഷത്തോളം രൂപയുടെ സഹായങ്ങളാണ്​ എത്തിച്ചത്​. കോവിഡ് മഹാമാരിക്കാലത്തും അത്തരത്തിൽ സഹായം നൽകി. കോളജിന്‍റെ ആധുനികവത്കരണമുൾപ്പെടെ കാര്യങ്ങളിൽ സൗകര്യമൊരുക്കൽ, അന്താരാഷ്ട്ര സെമിനാറുകൾ, സംവാദങ്ങൾ എന്നിവക്ക്​ സഹായങ്ങൾ എന്നിങ്ങനെ എപ്പോഴും സജീവമായുള്ള പൂർവവിദ്യാർഥികളുടെ പ്രവർത്തനങ്ങൾക്ക്​ പിന്തുണയുമായി ടി.കെ.എം മാനേജ്​മെന്‍റും ഒപ്പമുണ്ട്​. നിലവിൽ ടി.കെ.എം കോളജ് ഓഫ് ആർട്​സ്​ ആൻഡ്​ സയൻസ് കോളജ്​ പ്രിൻസിപ്പൽ ഡോ. ചിത്ര ഗോപിനാഥ്​ പ്രസിഡന്‍റും അൻവർ മുഹമ്മദ്​ ചെയർമാനും പി.എം. നജിമുദീൻ ജനറൽ സെക്രട്ടറിയുമായുള്ള സമിതിയാണ്​ നയിക്കുന്നത്​.