ബഫർ സോണിൽ കുടുങ്ങി നിശ്ചലമാകുന്നത്​ 3500 ഏക്കർ

തിരുവനന്തപുരം: സിൽവർ ലൈൻ ബഫർ സോണിൽ കെ- റെയിൽ സ്ഥിരീകരണം വന്നതോടെ പാതക്ക്​ ഏറ്റെടുക്കുന്നത്രതന്നെ ഭൂമി നഷ്ടപരിഹാരം പോലുമില്ലാതെ നിശ്ചലമാകുമെന്ന്​ വ്യക്തം. മ​ന്ത്രി സജി ചെറിയാനടക്കം സൃഷ്ടിച്ച ആശയക്കുഴപ്പങ്ങൾക്കിയിൽ പാതക്കിരുവശത്തും 10 മീറ്റർ വീതിയിൽ ബഫർ സോണുണ്ടാകുമെന്ന്​ കെ- റെയിൽ വ്യക്തമാക്കിയിരുന്നു. 529.45 കിലോമീറ്റർ നീളത്തിൽ ശരാശരി 20 മീറ്റർ വീതിയിലാണ്​ സിൽവർ ലൈൻ പാളങ്ങൾ പണിയുന്നത്​. ഡി.പി.ആർ പ്രകാരം ഇതിന്​ 3500 ​ഏക്കർ ഭൂമിയാണ്​ (1383 ഹെക്ടർ) ഏറ്റെടുക്കേണ്ടത്​. 20 മീറ്റർ ബഫർ സോൺകൂടി വരുന്നതോടെ 'സുരക്ഷിത മേഖല'യിൽ​ കുരുങ്ങുന്ന ഭൂമിയുടെ വിസ്തൃതിയും 3500 ഏക്കറോളം വരും. ബഫർ സോണിൽ ആദ്യ അഞ്ചു​ മീറ്ററിൽ ഒരു നിർമാണ പ്രവൃത്തിയും പാടില്ലാത്ത മേഖലയാണ്​. ഇരുവശത്തുമായി ഇത്തരത്തിൽ കടുത്ത നിയ​ന്ത്രണ മേഖലയിലുണ്ടാകുക 10 മീറ്റർ. സംസ്ഥാനമാകെ 1750 ഏക്കറോളം ഇങ്ങനെ നിശ്ചലമാകും. ശേഷിക്കുന്ന 1750 മീറ്ററിൽ അനുമതിയോടെ പ്രവർത്തനങ്ങളാകാമെന്ന്​ വിശദീകരിക്കുന്നുണ്ടെങ്കിലും അറ്റകുറ്റപ്പണി​കളോ മറ്റോ അനുവദിക്കുമെന്നല്ലാതെ പുതിയ നിർമാണ പ്രവൃത്തികൾക്ക്​ സാധ്യത വിരളം. ഫലത്തിൽ ഔദ്യോഗികമായി ഭൂമിയേറ്റെടുക്കുന്നവരെക്കാൾ പ്രഹരമേൽക്കുക ബഫർ സോൺ ഇരകൾക്കായിരിക്കും. 3500 ഏക്കർ ഭൂമി പദ്ധതിക്കും 3500 ഏക്കർ ബഫർ സോണിലും ഉൾപ്പെടുന്നതോടെ ആകെ​ ബാധിക്കുന്ന ഭൂമി 7000 ഏക്കറാകും. പുറമെ ടൗൺഷിപ്പുകളുടെ വികസനത്തിന്​ ഏറ്റെടുത്ത കൈമാറുന്ന 2500 ഏക്കർ കൂടിയാകു​മ്പോൾ 9500 ഏക്കറിലെത്തും​. സ്വകാര്യ ഭൂമിയിലെ സർവേക്ക്​ സർക്കാർ ധിറുതി കാട്ടു​ന്നുണ്ടെങ്കിലും റെയിൽവേ ഭൂമിയിൽ കല്ലിടാൻ അനുമതി കിട്ടിയിട്ടില്ല. 185 ഹെക്ടർ റെയിൽവേ ഭൂമിയിലൂടെയാണ്​ സിൽവർ ലൈൻ പോകുന്നത്​.​ റെയിൽവേ ഭൂമിയിൽ സംയുക്ത പരിശോധനക്കാണ്​ റെയിൽവേ ബോർഡ്​ നിർദേശം. സംയുക്ത പരിശോധന വൈകുന്നത്​ കൊണ്ടാണ്​ അനുമതി ലഭിക്കാത്തതെന്നാണ്​ കെ- റെയിൽ വിശദീകരണം. പദ്ധതിക്ക്​ കേന്ദ്രാനുമതി വൈകുന്ന സാഹചര്യത്തിൽ റെയിൽവേയുടെ വിയോജിപ്പാണ്​ കല്ലിടലിന്​ അനുവാദം വൈകാൻ കാരണമെന്നും വിലയിരുത്തലുണ്ട്​. 2180 കോടി രൂപയും 975 കോടി രൂപ വിലവരുന്ന 185 ഹെക്ടർ ഭൂമിയും ചേർത്ത് 3125 കോടിയാണ്​ റെയിൽവേ വിഹിതമായി കെ- റെയിൽ പ്രതീക്ഷിച്ചിരുന്നത്​. നിലവിലെ ധനസ്ഥിതിയിൽ 2180 കോടി ലഭി​ച്ചേക്കില്ലെന്നും സൂചനയുണ്ട്​. എം.ഷിബു