വനിതാ കമീഷൻ മെഗാ അദാലത്തിൽ 29 പരാതികളിൽ തീർപ്പായി

തിരുവനന്തപുരം: കേരള വനിതാ കമീഷൻ ജവഹർ ബാലഭവൻ ഹാളിൽ സംഘടിപ്പച്ച മെഗാ അദാലത്തിൽ 29 പരാതികളിൽ തീർപ്പായി. രണ്ട് പരാതികളിൽ പൊലീസ്​ റിപ്പോർട്ട് തേടും. രണ്ട് പരാതികളിൽ ഇരുകക്ഷികളെയും കൗൺസലിങ്ങിന് വിധേയരാക്കാൻ തീരുമാനിച്ചു. എതിർകക്ഷി ഹാജരാകാത്തതുൾപ്പെടെയുള്ള കാരണങ്ങളാൽ 57 പരാതികൾ അടുത്ത അദാലത്തിലേക്ക് മാറ്റി. ജില്ലയിലെ 90 പരാതികളാണ് പരിഗണനക്കെട​ുത്തത്. വനിതാ കമീഷൻ ചെയർപേഴ്സൺ എം.സി. ജോസഫൈൻ, അംഗങ്ങളായ ഇ.എം.രാധ, ഡോ. ഷാഹിദ കമാൽ, ഡയറക്ടർ വി.യു. കുര്യാക്കോസ്​, സി.ഐ സുരേഷ്കുമാർ എന്നിവർ പരാതികൾ കേട്ടു. നിയമപരമായി വിവാഹിതരാകാതെ ഒമ്പത് വർഷത്തെ ദാമ്പത്യത്തിനിടയിലുണ്ടായ നാല് കുഞ്ഞുങ്ങൾക്ക് ഉൾപ്പെടെ ചെലവിനുനൽകാത്ത യുവാവിനെതിരെ കമീഷൻ നടപടി സ്വീകരിച്ചു. ഇയാൾ പ്രതിമാസം അയ്യായിരം രൂപ വീതം ചെലവിന് നൽകണമെന്ന് കമീഷൻ നിർദേശിച്ചു. ഇതിനുപുറമേ ഇയാളുടെ പിതാവിൻെറ വസ്​തുവിൽ ഇയാൾക്കുള്ള വിഹിതം കുട്ടികളുടെ പേരിൽക്കൂടി വിൽപ്പത്രമാക്കണമെന്നും കമീഷൻ നിർദേശിച്ചു. അടിക്കടി പിണങ്ങിക്കഴിയുന്ന ദമ്പതികളിൽ അമ്മക്ക്​ കൂലിപ്പണിയായി കിട്ടുന്ന വരുമാനത്തിൽ നിന്നായിരുന്നു നാല് മക്കളെയും വളർത്തിയിരുന്നത്. മറ്റൊരു പരാതിയിൽ പരാതിക്കാരിയുടെ പതിനാല് പവൻ സ്വർണത്തിൽ പത്തേകാൽ പവൻ കമീഷ​ൻെറ സാന്നിധ്യത്തിൽ കൈമാറുകയും ശേഷിക്കുന്ന മൂന്നേമുക്കാൽ പവൻ ജൂൺ പത്തിനകം പരാതിക്കാരിക്ക് നൽകാമെന്നും പരാതിക്കാരിയുടെ മുൻ ഭർത്താവ് കമീഷന് ഉറപ്പ് നൽകി.