മലങ്കര കത്തോലിക്ക സഭയിൽ സജീവ സേവനത്തിലുള്ള മെ​ത്രാന്മാർ 13

തിരുവനന്തപുരം: രണ്ട്​ പുതിയ മെത്രാന്മാരെക്കൂടി നിയമിച്ചതോടെ മലങ്കര കത്തോലിക്കാസഭയിൽ കർദിനാൾ ഉൾപ്പെടെ സജീവ സേവനത്തിലുള്ള മെ​ത്രാന്മാരുടെ എണ്ണം 13 ആയി. സജീവ സേവനത്തിൽനിന്ന്​ വിരമിച്ച രണ്ട്​ ബിഷപ്പുമാർ ഇപ്പോൾ വിശ്രമജീവിതം നയിക്കുകയാണ്​. അവരെകൂടി ചേർത്താൽ സഭയിലെ മുഴുവൻ ബിഷപ്പുമാരുടെ എണ്ണം 15 ആകും. മെ​ത്രാൻ സ്ഥാനത്തേക്ക്​ പുതുതായി നിയോഗിതനായ ഫാ. ആന്‍റണി കാക്കനാട്ട്​ തിരുവല്ല കടമാൻകുളം ഇടവകാംഗമാണ്​. കാക്കനാട്ട്​ കെ. വർഗീസിന്‍റെയും സാറാമ്മയുടെയും മകനായി 1961ലാണ്​ ജനനം. ഹൈസ്കൂൾ വിദ്യാഭ്യാസത്തിന്​ ശേഷം തിരുവല്ല ഇൻഫന്‍റ്​ ജീസസ്​ മൈനർ സെമിനാരിയിൽ പ്രവേശിച്ചു. തത്ത്വശാസ്ത്രത്തിലും ദൈവശാസ്ത്രത്തിലും പഠനം പൂർത്തീകരിച്ചശേഷം 1987 ഡിസംബർ 30നാണ്​ വൈദികപട്ടം സ്വീകരിച്ചത്​. റോമിൽനിന്ന്​ ദൈവശാസ്ത്രത്തിൽ ബിരുദാനന്തരബിരുദവും ഡോക്ടറേറ്റും നേടി. തിരുവല്ല അതിരൂപതയുടെ വികാരി ജനറാൾ, ചാൻസലർ, മതബോധന ഡയറക്ടർ, സൻെറ്​​ മേരീസ്​ മലങ്കര സെമിനാരി പ്രഫസർ, വിവിധ ഇടവകകളിൽ വികാരി എന്നീ നിലകളിൽ പ്രവർത്തിച്ചിട്ടുണ്ട്​. ഇപ്പോൾ പട്ടം കാതോലിക്കേറ്റ്​ സെന്‍ററിൽ സുവിശേഷസംഘം എക്സി.ഡയറക്ടറായി പ്രവർത്തിക്കുന്നു. ബഹുഭാഷാ പണ്ഡിതനായ അദ്ദേഹം ഏഴ്​ പുസ്തകങ്ങളും രചിച്ചിട്ടുണ്ട്​. നിയുക്ത ബിഷപ്​ മോൺ. ഡോ. മാത്യു മനക്കരക്കാവിൽ 1955ൽ കൊട്ടാരക്കര പുത്തൂരിൽ മനക്കരക്കാവിൽ കെ. ഗീവർഗീസിന്‍റെയും കുഞ്ഞമ്മയുടെയും മകനായാണ്​ ജനിച്ചത്​. സ്കൂൾ പഠനശേഷം വൈദിക പരിശീലനത്തിന്​ സെമിനാരിയിൽ പ്രവേശിച്ചു. വടവാതൂർ സൻെറ്​ തോമസ്​ അപ്പോസ്തലിക്​ സെമിനാരിയിൽനിന്ന്​ തത്ത്വശാസ്ത്രത്തിലും ദൈവശാസ്ത്രത്തിലും പഠനം പൂർത്തീകരിച്ചു. 1983ൽ വൈദികപട്ടം സ്വീകരിച്ച അദ്ദേഹം ചെന്നൈ ലയോള കോളജിൽനിന്ന്​ ബിരുദവും പാരീസിലെ കത്തോലിക്ക സർവകലാശാലയിൽനിന്ന്​ ഫ്രഞ്ച്​ സാഹിത്യത്തിൽ ബിരുദാനന്തര ബിരുദവും തിരുനൽവേലി എം.എസ്​ സർവകലാശാലയിൽനിന്ന്​ ഡോക്ടറേറ്റും നേടി. തിരുവനന്തപുരം മാർ ഈവാനിയോസ്​ കോളജ്​ പ്രിൻസിപ്പൽ, കേരള സർവകലാശാല ലത്തീൻ-ഫ്രഞ്ച്​ ഭാഷ പഠനത്തിനുള്ള ബോർഡ് ​ഓഫ്​ സ്റ്റഡീസ്​ അംഗം, കേരള സർവകലാശാല അക്കാദമിക്​ കൗൺസിലംഗം എന്നീ നിലകളിൽ പ്രവർത്തിച്ചിട്ടുണ്ട്​. 35ഓളം ഇടവകകളിൽ വികാരിയായിരുന്ന അദ്ദേഹം ഇപ്പോൾ മേജർ അതിരൂപത മുഖ്യവികാരി ജനറാളായും സഭയുടെ കോളജുകളുടെ കറസ്​പോണ്ടന്‍റായും പ്രവർത്തിക്കുന്നു.