ഗ്രന്ഥശാല പ്രവർത്തകരുടെ സംഗമം 13ന്​

തിരുവനന്തപുരം: കേരള സ്​റ്റേറ്റ്​ ലൈബ്രറി കൗൺസിൽ സംഘടിപ്പിക്കുന്ന ലൈബ്രറി പ്രവർത്തക സംഗമം തലസ്ഥാനത്ത്​ സംഘടിപ്പിക്കും. ജിമ്മിജോർജ്​ ഇൻഡോർ സ്​റ്റേഡിയത്തിൽ 13ന്​ രാവിലെ 10 മുതൽ നടക്കുന്ന സംഗമം ഉച്ചക്ക്​ 12ന്​ മുഖ്യമന്ത്രി പിണറായി വിജയൻ ഉദ്​ഘാടനം ചെയ്യും. ലൈബ്രറി കൗൺസിലിൽ അഫിലിയേറ്റ്​ ചെയ്തിട്ടുള്ള ലൈബ്രറികളുടെ പഞ്ചായത്തുതല കൺവീനർമാർ മുതലുള്ള 1500 പ്രതിനിധികളാണ്​ സംഗമത്തിൽ പ​ങ്കെടുക്കുന്നതെന്ന്​ സ്വാഗത സംഘം ചെയർമാൻ കടകംപള്ളി സുരേന്ദ്രൻ എം.എൽ.എ, സ്​റ്റേറ്റ്​ ലൈബ്രറി കൗൺസിൽ സെക്രട്ടറി വി.കെ. മധു എന്നിവർ വാർത്തസമ്മേളനത്തിൽ അറിയിച്ചു. കേരളത്തിന്‍റെ നവോത്ഥാന മുന്നേറ്റത്തിൽ വ്യക്തമായ പങ്കുവഹിച്ച ഗ്രന്ഥശാലകളുടെ പ്രവർത്തനം കാലോചിതമായി മാറ്റം വരുത്തേണ്ടതുണ്ടെന്നും അതിനുവേണ്ടി തയാറാക്കിയ 'മുന്നേറ്റം 25' നയരേഖയുടെ അവതരണവും ഉദ്​ഘാടനാനന്തരം അവതരിപ്പിക്കും. എല്ലാ തദ്ദേശഭരണ വാർഡുകളിലും ഒരു ലൈബ്രറിയെന്ന ലക്ഷ്യവും മുന്നേറ്റത്തിന്‍റെ ഭാഗമായി നടപ്പാക്കും. ലൈബ്രറി കൗൺസിൽ സംസ്ഥാന പ്രസിഡന്‍റ്​ ഡോ. കെ.വി. കുഞ്ഞികൃഷ്ണൻ അധ്യക്ഷത വഹിക്കും. ഉന്നത വിദ്യാഭ്യാസ മന്ത്രി ആർ. ബിന്ദു, ഗതാഗത മന്ത്രി ആന്‍റണി രാജു, മേയർ ആര്യാ രാജേന്ദ്രൻ തുടങ്ങിയവർ സംസാരിക്കും. ഉച്ചക്ക്​ രണ്ടുമുതൽ നടക്കുന്ന സാഹിത്യ സമ്മേളനത്തിൽ സാംസ്കാരിക മന്ത്രി സജി ചെറിയാൻ അധ്യക്ഷത വഹിക്കും. സാഹിത്യകാരൻ ടി. പത്മനാഭൻ ഉദ്​ഘാടനം ചെയ്യും. വാർത്തസമ്മേളനത്തിൽ കൺവീനർ ബി.പി. മുരളിയും പ​ങ്കെടുത്തു.