പ്രതീക്ഷയുടെ ചിറകിലേറി 100 ഭിന്നശേഷിക്കുട്ടികള്‍

തിരുവനന്തപുരം: പരിമിതികളെ അതിജീവിക്കാന്‍ പുതിയ പ്രതീക്ഷകളുടെ ചിറകിലേറി 100 ഭിന്നശേഷിക്കുട്ടികള്‍ ഡിഫറന്‍റ്​ ആര്‍ട്ട്​ സെന്‍ററിന്‍റെ പടികടന്നെത്തി. സ്‌കൂള്‍ പ്രവേശനോത്സവത്തിന്റെ കെട്ടും മട്ടുമായാണ് സെന്ററിന്റെ രണ്ടാമത്തെ ബാച്ചിലേക്ക്​ പുതിയ കുട്ടികളെ സ്വീകരിച്ചത്. ഭിന്നശേഷിക്കുട്ടികളുടെ ചെണ്ടമേളവും ഘോഷയാത്രയും അരങ്ങേറി. ചലച്ചിത്ര സംവിധായകൻ അടൂര്‍ ഗോപാലകൃഷ്ണന്‍, ബാലാവകാശ കമീഷന്‍ ചെയര്‍മാന്‍ കെ.വി. മനോജ്കുമാര്‍, ജോര്‍ജ്കുട്ടി അഗസ്റ്റി, ജയ ഡാളി, ഗായിക മഞ്ജരി, യൂനുസ്, ഗോപിനാഥ് എന്നിവര്‍ കുട്ടികളെ സ്വീകരിച്ചു. രണ്ടായിരത്തോളം അപേക്ഷകളില്‍ നിന്ന് സ്‌ക്രീനിങ്​ നടത്തി അനുയോജ്യരായ 100 കുട്ടികളെയാണ് തെരഞ്ഞെടുത്തത്.