ടി.കെ.എം സപ്ലിമെന്‍റ്​ പേജ്​ 1

സ്​നേഹ നിലാവ്​ 1956ൽ, വികസനവഴിയിൽ പിന്നാക്കം നിൽക്കുകയായിരുന്ന കൊല്ലത്തിന്‍റെ മണ്ണിൽ സ്വകാര്യ കോളജിന്​ തറക്കല്ലിടാൻ എത്തിയതായിരുന്നു അന്നത്തെ രാഷ്ട്രപതി ഡോ. രാജേന്ദ്ര പ്രസാദ്​. സ്വന്തം അധ്വാനത്തിന്‍റെ വലി​യൊരു പങ്ക്​ മുടക്കി നാടിനായി ഒരു കോളജ്​ പണിയുന്ന തങ്ങൾ കുഞ്ഞ്​ മുസ്​ലിയാർ എന്ന മുതലാളി അദ്ദേഹത്തെ ശരിക്കും അമ്പരപ്പിച്ചിരുന്നു. അത്ഭുതം നിറഞ്ഞ സ്വരത്തിൽ കരിക്കോട്ടെ, വേദിയിൽവെച്ച്​ അദ്ദേഹം പറഞ്ഞു -''എല്ലാ സമ്പന്നരും തങ്ങൾ കുഞ്ഞ്​ മുസ്​ലിയാരെ പോലെ ആയിരുന്നെങ്കിൽ ഇന്ത്യയിലെ എല്ലാ പ്രശ്നങ്ങൾക്കും പരിഹാരമായേനെ''. എല്ലാ സമ്പന്നരും അങ്ങനെയായില്ലെങ്കിലും, തന്‍റെ മൂല്യബോധങ്ങളുടെ അച്ചിൽ തന്നെപ്പോലൊരാളെ തങ്ങൾ കുഞ്ഞ്​ മുസ്​ലിയാർ തന്നെ വാർത്തെടുത്തു. 'ടി.കെ.എം' എന്ന പ്രസ്ഥാനത്തെ ചുമലിലേറ്റി, തനിക്ക്​ പിൻഗാമിയായി എത്തുന്നയാൾ തന്നെപ്പോലെ തന്നെയാകണമെന്ന്​ ആ ധിഷണാശാലിക്ക്​ നിർബന്ധമുണ്ടായിരുന്നു. നേടുന്നതിനെക്കാൾ നൽകുന്നതിൽ നിർവൃതി കണ്ടെത്തുക എന്ന പാഠം പകർന്ന്​ അദ്ദേഹം നാടിന്​ സമ്മാനിച്ച പിൻഗാമിയാണ്​ ഡോ. ടി.കെ. ഷഹാൽ ഹസൻ മുസ്​ലിയാർ. സഹജീവി സ്​നേഹത്തിലും സഹായമനഃസ്ഥിതിയിലും എളിമയിലും പിതാവിന്‍റെ പാത പിന്തുടരുന്ന മകൻ. ആ മൂല്യബോധത്തിന്‍റെ ഇഴനൂൽ പൊട്ടാതെ​ ടി.കെ.​എം എന്ന മഹാപ്രസ്ഥാനത്തെ അരനൂറ്റാണ്ട്​ കാലമായി നയിക്കുന്ന സൗമ്യതയുടെ നിറദീപം​ നവതിയുടെ ദീപ്തപ്രഭയിലാണ്​. ഇക്കാലയളവിൽ വ്യവസായ, വിദ്യാഭ്യാസ, സാംസ്കാരിക, സാമൂഹിക മണ്ഡലങ്ങളിൽ തന്‍റേതായ വ്യക്തിമു​ദ്ര പതിപ്പിച്ച്​ നാടിന്‍റെ പുരോഗതിയിൽ സ്വന്തം പേരും എഴുതിച്ചേർത്ത മികവിന്‍റെ പേരു​കൂടിയാണ്​ ഡോ. ഷഹാൽ ഹസൻ മുസ്​ലിയാർ. 'ടി.കെ.എം' എന്ന വൻവൃക്ഷത്തിനുമേൽ പൊഴിയുന്ന സ്​നേഹത്തിന്‍റെ നറുനിലാവ് അങ്ങനെ നാടിനും പ്രിയപ്പെട്ട വെളിച്ചമായി ശോഭിക്കുന്നു. സ്​നേഹാദരവുമായി കൊല്ലം പൗരാവലിയും ടി.കെ.എം കോളജ്​ ഓഫ്​ ആർട്​സ്​ ആൻഡ്​ സയൻസ്​ അലുമ്നിയും ചേർന്ന്​ നവതിയാശംസ നേരാൻ​ വേദിയൊരുങ്ങുമ്പോൾ ആദരവർപ്പിക്കുന്നത്​ മുഖ്യമ​ന്ത്രി പിണറായി വിജയനാണ്​.