കെ.എസ്​.ആർ.ടി.സി: ബദൽ ഇന്ധനക്രമീകരണം പ്രഹരം കുറക്കും

തിരുവനന്തപുരം: ഇന്ധനം വാങ്ങലിൽ ഹൈകോടതി ഉത്തരവ്​ അനുകൂലമല്ലെങ്കിലും പ്രതിസന്ധിയുടെ തുടക്കത്തിൽ കെ.എസ്​.ആർ.ടി.സി ഒരുക്കിയ ബദൽ സംവിധാനം​ പ്രഹരം കുറക്കും. ഫെബ്രുവരി 16 മുതലാണ് ബൾക്ക്​ പർച്ചേസ്​ വിഭാഗത്തിനുള്ള ഇന്ധനവില ​ഇന്ധനക്കമ്പനികൾ വിപണി വിലയേക്കാൾ കുത്തനെ ഉയർത്തിയത്​. അന്ന്​ മുതൽ സ്വന്തം ചില്ലറ വിൽപന പമ്പുകളായ യാത്രാഫ്യുവൽസിൽനിന്നും സ്വകാര്യ പമ്പുകളിൽനിന്നും വിപണി വിലക്കാണ്​ കെ.എസ്​.ആർ.ടി.സി ഇന്ധനം വാങ്ങുന്നത്​. ഒരു ലിറ്റർ ഡീസൽ പോലും ഉയർന്ന വില നൽകി വാങ്ങിയിട്ടില്ല. വിപണി വിലക്ക്​​ കെ.എസ്​.ആർ.ടി.സിക്ക്​ ഇന്ധനം നൽകണമെന്ന സിംഗിൾ ബെഞ്ച്​ വിധിക്ക്​ ശേഷവും ഇതിന്​ കഴിഞ്ഞിട്ടില്ല. ഫലത്തിൽ കോടതിയിൽനിന്ന്​ അനുകൂല വിധിയുള്ളപ്പോഴും പുറത്തുനിന്നാണ്​ ​കെ.എസ്​.ആർ.ടി.സി ഇന്ധനം വാങ്ങിയിരുന്നത്​. ഡീസൽ വാങ്ങാനുള്ള ഓർഡറുകൾ ഓൺലൈനിലാണ്​ നൽകേണ്ടത്​. എന്നാൽ ഇതിന്​ സാധിക്കാത്തവിധം 'ഓൺലൈൻ തടസ്സങ്ങളാ'ണ് പോർട്ടലുകളിൽനിന്ന്​ കെ.എസ്​.ആർ.ടി.സി നേരിടുന്നത്​. ഇന്ധനക്കമ്പനികളുടെ പോർട്ടലുകളിൽനിന്ന്​ അനൗദ്യോഗികമായി​ ​കെ.എസ്​.ആർ.ടി.സിയെ ബ്ലോക്ക്​ ചെയ്തതിന്​ സമാനമായ സഹചര്യമാണുള്ളത്​. നടപടിക്രമങ്ങളും ജോലിയും കൂടുതലാണെന്നതാണ്​ കമ്പനികളിൽനിന്ന്​​ ബൾക്ക്​ പർച്ചേസർ എന്ന നിലയിൽ നേരിട്ടുവാങ്ങുന്നതിനെ അപേക്ഷിച്ച്​ ചില്ലറ വിൽപന ശാലകളിൽനിന്ന്​ വാങ്ങു​മ്പോൾ കെ.എസ്​.ആർ.ടി.സി​ നേരിടുന്ന പ്രായോഗിക പ്രയാസം. യാത്ര ഫ്യുവൽസ്​ ഇല്ലാത്ത സ്ഥലങ്ങളിൽ പ്രാദേശികമായാണ്​ ഡീസൽ വാങ്ങുന്നത്​. ഓരോ വാങ്ങലുകൾക്കും കണക്കും പണമടക്കലുമെല്ലാം സൂക്ഷ്മമായി കൈകാര്യം ചെയ്യണമെന്നതാണ്​ വെല്ലുവിളി. ബൾക്ക്​ പർച്ചേസർ എന്ന നിലയിലാണെങ്കിൽ ഒരുതവണയുള്ള പർച്ചേസും പേയ്​മെന്‍റുമേ ഉള്ളൂവെന്നതിനാൽ നടപടിക്രമങ്ങളിൽ സങ്കീർണത കുറവായിരിക്കും. കെ.എസ്​.ആർ.ടി.സിയുടെ വരുമാനത്തി‍ൻെറ നല്ലൊരു ശതമാനവും വിനിയോഗിക്കുന്നത്​ ഇന്ധനച്ചെലവിനാണ്​. ബൾക്ക്​ പർച്ചേസ്​ ഇനത്തിൽ ഡീസൽ വാങ്ങുന്ന ഘട്ടങ്ങളിൽ തുക പിന്നീട്​ നൽകുകയാണ്​ ചെയ്യുന്നത്​. ചെറിയ കാലയളവിലേക്ക്​ ഇന്ധനക്കമ്പനികൾ കുടിശ്ശികയും അനുവദിച്ചിരുന്നു. എന്നാൽ വാങ്ങൽ ചെറുകിട പമ്പുകളിലേക്ക്​ മാറിയതോ​ടെ അന്നന്ന്​ തന്നെ പണമടയ്​ക്കണം. മുമ്പ്​​ ഡീസൽ തുക തൽക്കാലത്തേക്ക്​ വകമാറ്റിയാണ്​ ശമ്പളത്തിന്​ പണം ​കണ്ടെത്തിയിരുന്നത്​. പുതിയ സാഹചര്യത്തിൽ​ ഇതിന്​ കഴിയില്ലെന്നതാണ്​ മറ്റൊരു വെല്ലുവിളി. എം. ഷിബു