ബസ്​ സമരം, ആശ്വാസമായി​ സമാന്തര സർവിസുകൾ

തിരുവനന്തപുരം: പണിമുടക്കിനെ തുടർന്ന്​ കെ.എസ്.ആർ.ടി.സി നിരത്തുകളിൽ നിന്ന്​ പിൻവാങ്ങിയ​തോടെ ദേശീയപാതയിലും എം.സിയിലുമടക്കം യാത്രക്കാർക്ക്​ ആശ്വാസമായത്​ സമാന്തര സർവിസുകൾ. പ്രധാന ഡിപ്പോകൾക്ക്​ മുന്നിലെല്ലാം തലസ്ഥാനത്തേക്കെത്താൻ യാത്രക്കാരുടെ വലിയ കൂട്ടമായിരുന്നു. രാവിലെ ഏഴിന്​ ബസ്​ കാത്തുനിന്നവർക്ക്​ ഒമ്പതിന്​​ പോലും ബസ്​ കിട്ടിയിരുന്നില്ല. ഒറ്റപ്പെട്ട്​ എത്തിയിരുന്ന ബസുകളിലാകട്ടെ കാലുകുത്താനിടയില്ലാത്ത വിധം തിരക്കും. ഈ സാഹചര്യത്തിലാണ്​ സമാന്തര സർവിസുകൾ രംഗത്തെത്തിയത്​. കെ.എസ്​.ആർ.ടി.സി ഡിപ്പോകൾക്ക്​ മുന്നിൽ നിന്നാണ്​ ഇവർ യാത്രക്കാരെ കയറ്റിയത്​. ഫാസ്​റ്റ്​ പാസഞ്ചറിന്‍റെ ചാർജായിരുന്നു ഈടാക്കിയതും. അധിക തുക അങ്ങോട്ട്​ നൽകാനും യാത്രക്കാർ തയാറായി. കൃത്യമായ ഇടവേളകളിലായിരുന്നു ഇവരുടെ സർവിസുകൾ. തരക്കേടില്ലാത്ത വരുമാനമാനവും ഇവർക്ക്​ കിട്ടി. സർക്കാർ ജീവനക്കാർ പലരും സ്വന്തം നിലക്ക്​​ വാഹനങ്ങൾ തരപ്പെടുത്തിയാണ്​ യാത്ര ചെയ്തത്​. എം.സി റോഡിലും എൻ.എച്ചിലും മാത്രമല്ല മറ്റിടങ്ങളിലും സമാന്തരസർവിസുകൾ നടന്നു. പണിമുടക്കിനെ തുടർന്ന്​ തലസ്ഥാനജില്ലയിലെ ഭൂരിഭാഗം സർവിസുകളും മുടങ്ങി. പാലോട്​, നെയ്യാറ്റിൻകര, കാട്ടാക്കട, വെഞ്ഞാറമൂട്​ ഡിപ്പോകളിൽ ഒരു സർവിസ്​ പോലും നടന്നില്ല. കിളിമാനൂർ, ആറ്റിങ്ങൽ ഡിപ്പോകളിൽ ഓരോന്നുവീതവും സിറ്റിയിൽ രണ്ടും പാറശ്ശാലയിൽ എട്ടും പേരൂർക്കടയിൽ പത്തും ബസുകളാണ്​ നിരത്തിലിറങ്ങിയത്​. പണിമുടക്കിയ ജീവനക്കാർ ഡിപ്പോകൾ കേന്ദ്രീകരിച്ച്​ പ്രതിഷേധ യോഗങ്ങളും ചേർന്നു. അതേസമയം രാത്രിയോടെ ദീർഘദൂര സർവിസുകൾ ഓടിത്തുടങ്ങിയിരുന്നു. ശമ്പളവിതരണം അനിശ്ചിതത്വത്തിലായ സാഹചര്യത്തിലാണ്​ ​ഭരണാനുകൂല സംഘടനയായ​ എ.ഐ.ടി.യു.സി, പ്രതിപക്ഷ സംഘടനകളായ ടി.ഡി.എഫ്​, ബി.എം.എസ്​, യൂനിയനുകൾ 24 മണിക്കൂർ സൂചന പണിമുടക്കിലേക്ക്​ നീങ്ങിയത്​.