'ജീവനക്കാർക്ക് സർക്കാർ നൽകിയ ഉറപ്പുപാലിക്കണം'

കൊല്ലം: ശമ്പള കരാറിലൂടെ എല്ലാ മാസവും അഞ്ചിന്​ മുമ്പ് ശമ്പളം നൽകാമെന്ന് കെ.എസ്​ആർ .ടി.സി ജീവനക്കാർക്ക് സർക്കാർ നൽകിയ ഉറപ്പ് പാലിക്കണമെന്ന് കെ.പി.സി.സി സെക്രട്ടറി സൂരജ് രവി ആവശ്യപ്പെട്ടു. എപ്രിലിലെ ശമ്പളം നൽകാത്ത നടപടിയിൽ പ്രതിഷേധിച്ച്​ ടി.ഡി.എഫ്​ കൊല്ലം ഡിപ്പോയിൽ നടത്തിയ പ്രകടനം ഉദ്ഘാടനം ചെയ്യുകയായിരുന്നു അദ്ദേഹം. എല്ലാ മാസവും ഏകദേശം 150 കോടി രൂപ ടിക്കറ്റ് വരുമാനമായും അതിലേറെ ടിക്കറ്റ് ഇതര വരുമാനവും ലഭിച്ചിട്ടും കൃത്യമായി ശമ്പളം നൽകാൻ മാനേജ്​മെന്‍റിനും സർക്കാറിനും കഴിയുന്നില്ല. തൊഴിലാളികളുടെയും ജനങ്ങളുടെയും കണ്ണിൽ പൊടിയിടാനുള്ള സർക്കാർ ശ്രമം വിലപ്പോവില്ലെന്ന് സൂരജ് രവി പറഞ്ഞു. പ്രകടനത്തിന് ബി. ബൈജു, ജെ. നിഷ, പി.ജെ. അനിൽകുമാർ, ആർ. ദീപു, വി.എസ്. ശ്രീനാഥ്, എം.എസ്. ശ്രീകുമാർ, ഷീജാകുമാരി, അനിൽകുമാർ, ക്രിസ്റ്റി മാനുവൽ, ബാലചന്ദ്രൻ പിള്ള, മുജീബ് എന്നിവർ നേതൃത്വം നൽകി.