വിദ്യാഭ്യാസ സംവരണവും നാലു ശതമാനമാക്കണം -കെ.എൽ.സി.എ

തിരുവനന്തപുരം: ഉദ്യോഗസംവരണത്തിന്​ സമാനമായി ലത്തീൻ കത്തോലിക്ക വിഭാഗത്തിന്‍റെ വിദ്യാഭ്യാസ സംവരണവും നാലു​ ശതമാനമായി ഉയർത്തണമെന്ന്​ കേരള ലാറ്റിൻ കാത്തലിക്​ അസോസിയേഷൻ. കൂടുതൽ വിദ്യാഭ്യാസാനുകൂല്യങ്ങൾ ഉറപ്പുവരുത്തുന്നതിന്​ സമുദായത്തെ ഒ.ബി.സി പട്ടികയിൽ ഉൾപ്പെടുത്തണമെന്നും അസോസിയേഷൻ പ്രസിഡന്‍റ്​ പാട്രിക്​ മൈക്കിൾ വാർത്തസമ്മേളനത്തിൽ ആവശ്യ​പ്പെട്ടു. സമുദായത്തിന്​ നഷ്ടമായ തൊഴിലവസരങ്ങൾ തിട്ടപ്പെടുത്തി പ്രത്യേക നിയമനത്തിന്​ ശിപാർശ ചെയ്യണം. സർക്കാർ ഉദ്യോഗസ്ഥരുടെ പട്ടിക തിരിച്ച കണക്ക്​ ലഭ്യമാക്കി അർഹമായ പ്രാതിനിധ്യം ഉറപ്പുവരുത്തണം. കേരള ലാറ്റിൻ കാത്തലിക്​ അസോസിയേഷൻ സുവർണ ജൂബിലി ആഘോഷ ഭാഗമായി തലസ്ഥാനത്ത്​ 29ന്​ സുവർണസ്മൃതി പരിപാടി സംഘടിപ്പിക്കും. വൈകീട്ട്​ അഞ്ചിന്​ തിരുവനന്തപുരം അതിരൂപതയുടെ നേതൃത്വത്തിൽ പാളയം രക്തസാക്ഷി മണ്ഡ​പത്തിൽ നടക്കുന്ന പരിപാടി ബിഷപ്​ ഡോ. തോമസ്​ ജെ. നെറ്റോ ഉദ്​ഘാടനം ചെയ്യും. രാഷ്ട്രീയ-സാംസ്കാരിക മേഖലകളിൽ മികച്ച സേവനം ചെയ്തു​ കടന്നുപോയ സമുദായാംഗങ്ങളെ ചടങ്ങിൽ അനുസ്മരിക്കുമെന്ന്​ അതിരൂപത ചാൻസലർ മോൺ. സി. ജോസഫ്​ അറിയിച്ചു. മന്ത്രി ജി.ആർ അനിൽ, സഹായ മെ​ത്രാൻ ഡോ.ജി. ക്രിസ്തുദാസ്​, എം.എൽ.എമാരായ എം. വിൻസെന്‍റ്​, വി.കെ. പ്രശാന്ത്​ തുടങ്ങിയവർ പ​ങ്കെടുക്കും. കെ.എൽ.സി.എ ഭാരവാഹികളായ ഫാ. ജോൺഡാൾ, ജോസ്​ മെസ്മിൻ, ജോസഫ്​ ജോൺസൺ എന്നിവരും വാർത്തസമ്മേളനത്തിൽ പ​​ങ്കെടുത്തു.