പെൻഷൻ നൽകാനില്ലെങ്കിലും 'കേരള'യിൽ പുത്തൻ കാർ വാങ്ങാൻ പണമുണ്ട്​

തിരുവനന്തപുരം: പെൻഷൻ കുടിശ്ശിക പോലും കൊടുക്കാനാവാതെ കടുത്ത സാമ്പത്തിക പ്രതിസന്ധി നേരിടുന്ന കേരള സർവകലാശാലയിൽ വൈസ്​ ചാൻസലർക്ക്​ പിന്നാലെ പ്രോ- വൈസ്​ ചാൻസലർക്കും പുത്തൻ കാർ വാങ്ങുന്നു. പ്രോ-വൈസ് ചാൻസലർക്ക്​ ഇന്നോവ ക്രിസ്റ്റ കാർ വാങ്ങാൻ 28 ലക്ഷം രൂപ സർവകലാശാല ഫണ്ടിൽനിന്ന് അനുവദിച്ച്​ രജിസ്ട്രാർ ഉത്തരവിറക്കി. മാർച്ചിൽ ചേർന്ന സിൻഡിക്കേറ്റ് യോഗമാണ് പി.വി.സിക്ക് യാത്ര ചെയ്യാൻ പുതിയ കാർ വാങ്ങാൻ തീരുമാനിച്ചത്. സർവകലാശാല ജീവനക്കാരുടെ പെൻഷൻ പരിഷ്കരണം മൂലമുണ്ടാകുന്ന അധികച്ചെലവ് സർവകലാശാലയുടെ തനത്​ ഫണ്ടിൽനിന്ന്​ കണ്ടെത്തണമെന്ന സർക്കാറിന്‍റെ പുതിയ ഉത്തരവിന്‍റെ പേരിൽ പെൻഷൻ കുടിശ്ശികഉൾപ്പെടെ തടഞ്ഞുവെച്ച സർവകലാശാലയാണ് പ്രോ-വൈസ് ചാൻസലർക്ക് പുതിയ കാർ വാങ്ങാൻ ലക്ഷങ്ങൾ മുടക്കുന്നത്. പ്രോ-വൈസ് ചാൻസലർ ഇപ്പോൾ ഉപയോഗിക്കുന്ന കാറിന് മൂന്നുവർഷം മാത്രമാണ് പഴക്കമുള്ളത്. പ്രോ-വൈസ് ചാൻസലർ ആവശ്യപ്പെടാതെതന്നെ സിൻഡിക്കേറ്റ് അംഗങ്ങൾ മുൻകൈയെടുത്ത് അദ്ദേഹത്തിന് പുതിയ കാർ വാങ്ങാൻ തീരുമാനിക്കുകയായിരുന്നു. സിൻഡിക്കേറ്റ് അംഗങ്ങളുടെ യാത്ര ആവശ്യങ്ങൾക്ക് നിലവിൽ പ്രോ-വൈസ്​ചാൻസലർ ഉപയോഗിക്കുന്ന വാഹനം കൂടി ഉപയോഗിക്കാനാണ് അദ്ദേഹത്തിന്​ പുതിയ കാർ വാങ്ങുന്നതെന്നാണ്​ ആരോപണം. 10 ലക്ഷം രൂപക്ക്​ മേലുള്ള വാഹനങ്ങൾ വാങ്ങുന്നതിനുള്ള സർക്കാർ നിയന്ത്രണങ്ങൾ പാലിക്കാതെയാണ് വില കൂടിയ പുതിയ വാഹനം വാങ്ങുന്നതെന്നും ജീവനക്കാർക്കിടയിൽ ആക്ഷേപമുണ്ട്.