ഇഫ്താർ സംഗമവും റമദാൻ റിലീഫും സജീവം

കൊല്ലം: റമദാൻ അവസാന പത്തിലെത്തിയതോടെ റിലീഫ് പ്രവർത്തനങ്ങളും ഇഫ്താർ സംഗമവും വർധിച്ചു. വിവിധ സംഘടനകളും സ്ഥാപനങ്ങളും ഉൾപ്പെടെ നടത്തുന്ന ഇഫ്താർ സംഗമങ്ങൾ വ്യാപകമായി. പ്രമുഖരെ പങ്കെടുപ്പിച്ചുകൊണ്ടാണ് മിക്ക ഇഫ്താറുകളും. ഇതോടൊപ്പം റമദാൻ റിലീഫ് പ്രവർത്തനങ്ങളും വർധിച്ചു. ചികിത്സ സഹായം, ഭക്ഷ്യധാന്യകിറ്റ്​ വിതരണം എന്നിവയാണ് വിവിധ സ്ഥലങ്ങളിൽ നടക്കുന്നത്. ​റമദാനിന്‍റെ ആദ്യ ആഴ്​ചയോടെ തന്നെ വിവിധ സംഘടനകൾ റിലീഫ് ആരംഭിച്ചിരുന്നു. റമദാൻ അവസാന പത്തിലേക്കെത്തിയതോടെ സംഘടനകളെല്ലാം വിവിധ പ്രവർത്തനങ്ങളുമായി സജീവമാണ്​. ജമാഅത്ത്​ കമ്മിറ്റികളുടെ നേതൃത്വത്തിലും റമദാൻ കിറ്റ്​ വിതരണം പുരോഗമിക്കുന്നുണ്ട്​. അർഹരായവരെ കണ്ടെത്തി പരമാവധി സഹായമെത്തിക്കാനുള്ള ശ്രമമാണ്​ സംഘടനകളും ജമാഅത്തുകളും നടത്തുന്നത്​.