സാമ്പത്തിക ബാധ്യത പരിഹരിക്കാൻ ക്രൈംബ്രാഞ്ചിലെ പൊലീസ്​ തസ്തികകൾ വെട്ടി

തിരുവനന്തപുരം: കേസന്വേഷണത്തിന്​ മതിയായ ഉദ്യോഗസ്ഥരില്ലാതെ വലയുന്നതിനിടെ നിയമോപദേശകരെ നിയമിക്കാനായി ക്രൈംബ്രാഞ്ചില്‍ 11 പൊലീസ് തസ്തികകള്‍ നിര്‍ത്തലാക്കി. നിയമോപദേശകരുടെ ശമ്പള ബാധ്യതയുടെ പേരിലാണ്​ ക്രൈംബ്രാഞ്ചിൽ നിലവിലുണ്ടായിരുന്ന തസ്തിക വെട്ടിക്കുറച്ചത്​. എന്നാൽ ക്രൈംബ്രാഞ്ചിന്​ സ്വതന്ത്രാധികാരം കൂടുതലായി അനുവദിക്കുന്നതിനും ​കേസന്വേഷണം പൂർത്തിയാക്കുന്നതിലെ കാലതാമസം ഒഴിവാക്കുന്നതിനുമാണ്​ ​ നിയമോപദേശകരെ അനുവദിക്കുന്നതെന്നാണ്​ സർക്കാർ വിശദീകരണം. ക്രൈംബ്രാഞ്ച്​ കേസന്വേഷണം നീണ്ടുപോകുന്നത്​ മതിയായ ജീവനക്കാരില്ലാത്തതിനാലാണെന്ന ആക്ഷേപം മുമ്പ്​ മുതലുണ്ട്​. അതിന്​ പിന്നാലെയാണ്​ ഇപ്പോൾ ഉണ്ടായിരുന്ന തസ്തികകളും വെട്ടിക്കുറച്ചത്​. രണ്ട്​ എ.എസ്.ഐ, നാല്​ സീനിയര്‍ സിവില്‍ പൊലീസ് ഓഫിസര്‍, അഞ്ച്​ സിവിൽ പൊലീസ്​ ഓഫിസർ (സി.പി.ഒ) തസ്തികകളാണ് നിര്‍ത്തലാക്കിയത്​. പ്രധാന കേസുകള്‍ അന്വേഷിക്കുന്ന ഡിവൈ.എസ്​.പിമാരുടെ സംഘത്തിൽ പോലും നാലും അഞ്ചും തസ്തികകള്‍ ഒഴിഞ്ഞ് കിടക്കുകയാണെന്നാണ്​ ക്രൈംബ്രാഞ്ച്​ വൃത്തങ്ങൾ പറയുന്നത്​. കേരളത്തിലെ കുറ്റാന്വേഷണ ഏജന്‍സിയായ ക്രൈംബ്രാഞ്ചിന് കേന്ദ്ര അന്വേഷണ ഏജന്‍സികളായ സി.ബി.ഐയുടെയും എൻ.ഐ.എയുടെയും മാതൃകയില്‍ സ്വന്തമായി നിയമോപദേശകരെ അനുവദിക്കുകയാണ്. അതിനായി നാല് പുതിയ തസ്തിക സൃഷ്ടിച്ചാണ്​ സര്‍ക്കാര്‍ ഉത്തരവ്​ പുറപ്പെടുവിച്ചത്​. നിലവില്‍ അതത് കോടതികളിലെ പബ്ലിക് പ്രോസിക്യൂട്ടര്‍മാരോടോ ഹൈകോടതിയിലെത്തുന്ന കേസുകളില്‍ അഡ്വക്കറ്റ്​ ജനറലിനോടോ ആണ് ക്രൈംബ്രാഞ്ച് നിയമോപദേശം തേടി വരുന്നത്​. എന്നാൽ നിയമോപദേശം ലഭിക്കാൻ കാലതാമസമുണ്ടാകുന്നത്​ കേസന്വേഷണം പൂർത്തിയാക്കി കുറ്റപത്രം സമർപ്പിക്കാൻ കാലതാമസമുണ്ടാക്കുന്നെന്ന ആക്ഷേപമുണ്ട്​. വിജിലൻസിന്​ നിയമോപദേശം നൽകാൻ നിലവിൽ സ്വന്തം അഭിഭാഷകരുണ്ട്​. അതേ നിലയിലാണ്​ ക്രൈംബ്രാഞ്ചിനും സ്വന്തം നിയമോപദേശകർ വരുന്നത്​. ഒരു ലക്ഷത്തോളമാണ് ഓരോ നിയമോപദേശകരുടെയും ശമ്പളം. അതുണ്ടാക്കുന്ന നഷ്ടം നികത്താനായാണ്​ 11 പൊലീസ് തസ്തിക ഇല്ലാതാക്കിയതെന്നാണ്​ വിശദീകരണം. നിയമോപദേശകർ എന്ന നിലയിൽ സര്‍ക്കാറിന്​ താല്‍പര്യമുള്ള അഭിഭാഷകര്‍ക്ക് ഉന്നത ജോലി നല്‍കുകയാണ് ഇതിലൂടെ ലക്ഷ്യമിടുന്നതെന്ന ആക്ഷേപവും നിലവിലുണ്ട്​. ബിജു ചന്ദ്രശേഖർ