അധ്യാപക പരിശീലനം മേയ്​ രണ്ടാംവാരത്തിൽ തുടങ്ങും

തിരുവനന്തപുരം: സ്കൂൾ അധ്യാപക പരിശീലനം മേയ് രണ്ടാംവാരം ആരംഭിച്ച്​ അവസാന വാരത്തിൽ പൂർത്തിയാകും. പരിശീലനത്തിന് മൊഡ്യൂള്‍ തയാറാക്കാന്‍ കോര്‍ സ്റ്റേറ്റ് റിസോഴ്സ് ഗ്രൂപ്പില്‍ 150ഓളം പേരെ ചുമതലപ്പെടുത്തിയിട്ടുണ്ട്. ഇവര്‍ സ്റ്റേറ്റ് റിസോഴ്സ് ഗ്രൂപ്പിൽപെട്ട 900ൽപരം പേര്‍ക്ക് പരിശീലനം നല്‍കും. ഇവര്‍ ജില്ലകളിലെ 6200 പേര്‍ക്ക് പരിശീലനം നല്‍കും. ഒന്നുമുതൽ പത്ത്​ വരെ ക്ലാസുകളിലെ 134000 അധ്യാപകർക്കാണ്​ പരിശീലനം നല്‍കുക. ഹയര്‍ സെക്കൻഡറി/വി.എച്ച്​.എസ്​.ഇ അധ്യാപകര്‍ക്ക് സ്കൂള്‍ തുറക്കുന്ന മുറക്ക്​ പരിശീലനം നല്‍കും. പരിശീലനത്തി‍ൻെറ സമഗ്രമായ വിശദാംശങ്ങള്‍ രേഖപ്പെടുത്തുന്നതിന് പ്രത്യേകമായ ഓണ്‍ലൈന്‍ ട്രെയിനിംഗ് മാനേജ്മെന്‍റ് സിസ്റ്റം കൈറ്റ് തയാറാക്കും. പരിശീലനത്തില്‍ പങ്കെടുക്കുന്നവര്‍ക്കുള്ള രജിസ്ട്രേഷന്‍, ഷെഡ്യൂളിങ്​, അറ്റന്‍റന്‍സ്, ബാച്ച്​ തിരിക്കല്‍, പങ്കെടുത്തവര്‍ക്കുള്ള സര്‍ട്ടിഫിക്കറ്റ് തയാറാക്കല്‍ എന്നിങ്ങനെയുള്ള സൗകര്യങ്ങള്‍ക്ക്​ പുറമെ പരിശീലനത്തി‍ൻെറ ഫീഡ്ബാക്ക് ശേഖരിക്കാനും ഇതില്‍ സൗകര്യമുണ്ടാകും. വിദ്യാഭ്യാസ വകുപ്പിന്​ കീഴിലുള്ള ഓഫിസുകളിലെ ഫയലുകൾ തീർപ്പാക്കാൻ പ്രത്യേക അദാലത്തുകൾ നടത്തും. സംസ്ഥാനതല ഉദ്​ഘാടനം മേയ് ഒമ്പതിന് പരീക്ഷ ഭവനില്‍ നടക്കും.