കേരള സർവകലാശാല കലോത്സവത്തിന്​ ഇന്ന്​ തുടക്കം​

കൊല്ലം: വിദ്യാർഥികളുടെ കലാവൈഭവത്തിന്​ പുത്തനുണർവുമായി കേരള സർവകലാശാല യൂനിയൻ കലോത്സവത്തിന്​ ശനിയാഴ്ച​ തുടക്കമാകും. സർവകലാശാലക്ക്​ കീഴിൽ നാല്​ ജില്ലകളിലായുള്ള 250 ലേറെ കോളജുകളിൽ നിന്നുള്ള 3000ത്തോളം വിദ്യാർഥികളാണ്​ അഞ്ച്​ ദിവസം നീണ്ടുനിൽക്കുന്ന ക​ലോത്സവത്തിൽ മാറ്റുരക്കുന്നത്​. ശനിയാഴ്ച ​വൈകീട്ട്​ അഞ്ചിന്​ കൊല്ലം എസ്​.എൻ കോളജിലെ പ്രധാന വേദിയായ കെ.പി.എ.സി ലളിത നഗറിൽ ഉദ്​ഘാടന ചടങ്ങ്​ നടക്കും. സംവിധായകൻ എബ്രിഡ്​ ഷൈൻ മുഖ്യാതിഥിയാകും. വൈകീട്ട്​ ആ​റിന്​ മോഹിനിയാട്ടത്തോടു​കൂടി മത്സരങ്ങൾക്ക്​ തുടക്കമാകും. കൊല്ലം നഗരത്തിലെ അഞ്ച്​ കോളജുകളിലെ ഒമ്പത്​ വേദികളിലായാണ്​ മത്സരങ്ങൾ നടക്കുന്നത്​. 102 ഇനങ്ങളിലായി ആൺ, പെൺ, ട്രാൻസ്​​ജെൻഡർ വിഭാഗങ്ങളിൽ വിദ്യാർഥികൾ മാറ്റുരക്കും. 27ന്​ ആണ്​ സമാപനം.