ഡോ.എൻ. നാരായണൻ നായർ നിയമ അധ്യാപനത്തിന് ജനകീയമുഖം നൽകിയ വ്യക്തി -മുഖമന്ത്രി

തിരുവനന്തപുരം: നിയമ അധ്യാപനത്തിന് ജനകീയമുഖം നൽകിയ വ്യക്​തിയാണ്​ ലോ അക്കാദമി സ്ഥാപകൻ ഡോ. എൻ. നാരായണൻ നായരെന്ന്​ മുഖ്യമന്ത്രി പിണറായി വിജയൻ. പേരൂർക്കട ലോ അക്കാദമി സ്ഥാപകൻ ഡോ.എൻ. നാരായണൻ നായർ ഒന്നാം വാർഷിക അനുസ്മരണ സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. നിയമ സർവകലാശാല രൂപപ്പെടുത്തുന്നതിനും അതിന്​ ശേഷമുള്ള പ്രവർത്തനങ്ങൾക്കും മുഴുവൻ സമയവും നൽകിയ വ്യക്​തിയാണ്​ അദ്ദേഹം. സാമൂഹിക മണ്ഡലത്തിൽ നികത്താനാകാത്ത വിടവാണ് അദ്ദേഹത്തിന്‍റേത്​. നിയമജ്ഞനും വിദ്യാഭ്യാസ വിവക്ഷൻ എന്നീ നിലകളിലും ദീർഘകാലം അ​ദ്ദേഹം ത‍​ൻെറ സേവനം നൽകി. അർപ്പണബോധത്തി‍ൻെറ ദൃഷ്ടാന്തമാണ് ലോ അക്കാദമി. ജുഡീഷ്യറിയുടെ എല്ലാ തലത്തിലുള്ളവരുമായി നല്ലബന്ധം പുലർത്തിയ ആളാണ്. മുഴുവൻ സമയവും അക്കാദമിക് തലത്തിലും പൊതുരംഗത്തുമായി വിനിയോഗിച്ച വ്യക്​തിയാണ്​ നാരായണൻ നായരെന്നും മുഖ്യമന്ത്രി പറഞ്ഞു. കേരളത്തിൽ നിയമസാക്ഷരത വളർത്തുന്നതിൽ വലിയ പങ്കുവഹിച്ച ആളാണ് നാരായണൻ നായരെന്ന്​ മുതിർന്ന സി.പി.എം നേതാവ് എസ്. രാമചന്ദ്രൻപിള്ള പറഞ്ഞു. സി.പി.എം ജില്ല സെക്രട്ടറി ആനാവൂർ നാഗപ്പൻ അധ്യക്ഷത വഹിച്ചു. കേരള അഡ്മിനിസ്ട്രേറ്റീവ് ട്രൈബ്യൂണൽ ചെയർമാൻ ജസ്റ്റിസ് സി.കെ. അബ്ദുൽ റഹീം, കോലിയക്കോട് കൃഷ്ണൻ നായർ, സി.പി.ഐ അസിസ്റ്റന്‍റ്​ സെക്രട്ടറി കെ. പ്രകാശ് ബാബു, ബി.ജെ.പി ജില്ല പ്രസിഡന്‍റ്​ വി.വി. രാജേഷ്, ലോ അക്കാദമി സെക്രട്ടറി നാഗരാജ് നാരായണൻ, എക്സിക്യൂട്ടീവ് കമ്മിറ്റി അംഗം ഡോ.എൻ.കെ. ജയകുമാർ എന്നിവർ സംസാരിച്ചു.