തെക്കന്‍ കുരിശുമല മറ്റൊരു കാല്‍വരിയാക്കി തീർഥാടക ലക്ഷങ്ങള്‍ മലകയറി

വെള്ളറട: പ്രസിദ്ധ തീർഥാടനകേന്ദ്രമായ തെക്കന്‍ കുരിശുമല 65ാമത് മഹാതീർഥാടനം തീർഥാടക ലക്ഷങ്ങളെ സാക്ഷിയാക്കി സമാപിച്ചു. രണ്ടാംഘട്ട തീർഥാടനം ആരംഭിക്കുന്നതിന് മുമ്പ്​ ഓശാന ഞായര്‍ മുതല്‍ തീർഥാടകരുടെ തിരക്ക് പകല്‍ സമയങ്ങളിൽ ഏറിയിരുന്നു. പെസഹ വ്യാഴം പ്രഭാതം മുതല്‍തന്നെ കുരിശിന്റെ വഴി പ്രാർഥനകളുമായി പതിനായിരങ്ങള്‍ മലകയറി പ്രാർഥിച്ചു. രണ്ടുദിവസങ്ങള്‍ക്ക് മുമ്പ്​ ശക്തമായി പെയ്ത മഴ മാറിനിന്നതോടെ തീർഥാടകരുടെ തിരക്ക് മുന്‍ വര്‍ഷങ്ങളെ അപേക്ഷിച്ച് വര്‍ധിച്ചു. തമിഴ്‌നാട് ഭാഗത്തുനിന്ന്​, പത്തുകാണി, ആറുകാണി വഴി നൂറുകണക്കിന് തീർഥാടകര്‍ നെറുകയിലെത്തി. പെസഹ വ്യാഴം മുതൽ ആരംഭിച്ച തീർഥാടകരുടെ തിരക്ക് ദുഃഖവെള്ളിയാഴ്ച രാത്രിയിലും തുടര്‍ന്നു. നെറുകവരെ ഈ ദിവസങ്ങളില്‍ വെളിച്ചം ക്രമീകരിച്ചിരുന്നത് തീർഥാടകര്‍ക്ക് സൗകര്യമായി. കേരള-തമിഴ്‌നാട് പൊലീസും വോളന്റിയേഴ്‌സും തീർഥാടകര്‍ക്ക് വേണ്ടതായ ക്രമീകരണങ്ങള്‍ ഒരുക്കി. ദുഃഖവെള്ളിയാഴ്ച രാവിലെ അഞ്ചുമുതല്‍ ബ്രദര്‍ കുര്യന്‍ ഇടുക്കിയുടെ നേതൃത്വത്തില്‍ ധ്യാനം സംഘടിപ്പിച്ചിരുന്നു. ഉച്ചക്ക്​ ഒന്നിന്​ വിശുദ്ധ പത്താം പീയൂസ് ദേവാലയത്തിൽനിന്ന്​ സംഗമവേദിവരെ പാപപരിഹാര സ്ലീവാപാത നടന്നു. വൈകുന്നേരം മൂന്നിന്​ പീഡാനുഭവ അനുസ്മരണം, കുരിശിന്റെ ആരാധന, കുരിശിന്റെ വഴി, കുരിശു ചുംബിക്കല്‍, ദിവ്യബലി എന്നിവക്ക്​ തീർഥാടന കേന്ദ്രം റെക്ടര്‍ മോണ്‍. ഡോ. വിന്‍സെന്റ് കെ.പീറ്റര്‍ മുഖ്യകാർമികത്വം വഹിച്ചു. വലിയ ശനിയാഴ്ച ആറിന്​ സംഗമവേദിയിൽ കര്‍ത്താവിന്റെ ഉത്ഥാന മഹോത്സവ തിരുകർമങ്ങള്‍ക്ക് ഉണ്ടന്‍കോട് സെന്റ് ജോസഫ് ഫെറോന പള്ളി സഹവികാരി ഫാ.അരുണ്‍ കുമാര്‍ കാർമികത്വം വഹിച്ചു. ചടങ്ങുകളില്‍ നൂറുകണക്കിന് തീർഥാടകര്‍ സംബന്ധിച്ചു. തീർഥാടനകേന്ദ്രം കമ്മിറ്റി നേതൃത്വം നല്‍കി.