വയോധികയായ മാതാവിന് ക്രൂരമർദനം; മകൻ അറസ്റ്റിൽ

കൊല്ലം: വയോധികയായ മാതാവിനെ ആക്രമിച്ച മകനെ ചവറ തെക്കുംഭാഗം പൊലീസ് അറസ്റ്റ് ചെയ്തു. തെക്കുംഭാഗം മുട്ടം പരുത്തിക്കൽ കിഴക്കതിൽ ഓമനയെ (84) മർദിച്ച കേസിൽ മകൻ ഓമനക്കുട്ടനാണ് (52) അറസ്റ്റിലായത്. ഞായറാഴ്ച വൈകീട്ട്​ ഓമനയുടെ പക്കൽ മുമ്പ് നൽകിയ പണം തിരികെ ആവശ്യപ്പെട്ട് മദ്യപിച്ചെത്തിയ ഓമനക്കുട്ടൻ മർദിക്കുകയായിരുന്നു. സമീപവാസികൾ പകർത്തിയ ദൃശ്യങ്ങൾ പുറത്തു വന്നതോടെയാണ് മർദനം പുറത്തറിഞ്ഞത്. മദ്യപിച്ചെത്തുന്ന ദിവസങ്ങളിൽ ഓമനക്കുട്ടൻ മാതാവിനെ മർദിക്കുന്നത് പതിവാണെന്ന് നാട്ടുകാർ പറഞ്ഞു. മാതാവ് നീണ്ടകര താലൂക്കാശുപത്രിയിൽ ചികിത്സയിലാണ്.