കേരള സർവകലാശാലക്ക്​ വീണ്ടും ഒന്നാം സ്​ഥാനം

തിരുവനന്തപുരം: യു.ജി.സിയുടെ കീഴിലുള്ള 66 എച്ച്.ആർ.ഡി.സികളുടെ 2022ൽ ഇറങ്ങിയ അവലോകന റിപ്പോർട്ടിൽ പ്രവർത്തന പുരോഗതിയും ഗുണനിലവാരം നിലനിർത്തുകയും ഏറ്റവുമധികം അധ്യാപകരെ പങ്കെടുപ്പിക്കുകയും ചെയ്ത കേരള സർവകലാശാലക്ക്​ യു.ജി.സി എച്ച്.ആർ.ഡി.സി തലത്തിൽ വീണ്ടും ദേശീയതലത്തിൽ ഒന്നാം സ്​ഥാനം. രാജ്യത്ത്​ ആകെ 66 എച്ച്.ആർ.ഡി.സികളുടെ 2015 മുതൽ 2019 വരെയുള്ള കാലയളവിലെ പ്രവർത്തനം ഡൽഹിയിൽ നടന്ന സ്റ്റാൻഡിങ് കമ്മിറ്റി വിലയിരുത്തിയതിൽ നിന്നുമാണ് കേരള സർവകലാശാല യു.ജി.സി എച്ച്.ആർ.ഡി.സി 4.52 പോയൻറ് നേടി ഒന്നാം സ്​ഥാനത്തെത്തിയത്. കഴിഞ്ഞ 15 വർഷമായി ഈ സ്​ഥാനം നിലനിർത്തിവരുകയാണ്.