മുദാക്കലിൽ വീട് കുത്തിത്തുറന്ന് പത്തുപവൻ കവർന്നു

ആറ്റിങ്ങൽ: മുദാക്കൽ പഞ്ചായത്തിൽ ഇളമ്പ എച്ച്.എസ്.എസിനുസമീപം വീട്ടിൽ വൻ കവർച്ച; പത്തുപവന്റെ സ്വർണാഭരണങ്ങൾ മോഷണം പോയി. മണിരാജിന്റെ വൃന്ദാവനം വീട്ടിലാണ് മോഷണം നടന്നത്. മണിരാജ് ഗൾഫിലാണ്. ഭാര്യ സിനിയും രണ്ടുപെൺമക്കളുമാണ് താമസം. കഴിഞ്ഞദിവസം ഇവർ അമുന്തിരത്തെ കുടുംബവീട്ടിലായിരുന്നു. ചൊവ്വാഴ്ച ഉച്ചയോടെ തിരിച്ചെത്തുമ്പോൾ വീടിന്റെ മുൻവാതിലിന്റെ പൂട്ട് കുത്തിപ്പൊളിച്ച നിലയിലായിരുന്നു. അകത്തുകയറി നോക്കിയപ്പോഴാണ്​ കവർച്ച നടന്നത് അറിഞ്ഞത്​. ആറ്റിങ്ങൽ പൊലീസ് അന്വേഷണം ആരംഭിച്ചു. ഡോഗ് സ്ക്വാഡും പരിശോധന നടത്തി. വീട്ടിൽ അലമാരയിലെ എല്ലാ സാധനങ്ങളും വലിച്ചുവാരി പുറത്തിട്ട നിലയിലാണ്. മുദാക്കൽ ഭാഗത്ത് മോഷണം പെരുകുന്നതായി നാട്ടുകാർ പറഞ്ഞു. മൂന്ന് മാസം മുമ്പ്​ ചെമ്പൂര് ഷംസു സലാമിന്റെ വീട്ടിന്റെ കതക് തീയിട്ട്​ നശിപ്പിച്ചായിരുന്നു കവർച്ച. ഇതുവരെ പ്രതിയെ പിടികൂടാനായിട്ടില്ലെന്ന് നാട്ടുകാർ പറഞ്ഞു.