വർക്കലയിൽ നിർത്തലാക്കിയ സ്റ്റോപ്; റെയിൽവേ മന്ത്രിക്ക് നിവേദനം

വർക്കല: വർക്കലയിൽ നിർത്തലാക്കിയ ട്രെയിനുകളുടെ സ്റ്റോപ് പുനഃസ്ഥാപിക്കാൻ നിവേദനം. വർക്കല റെയിൽവേ വെൽഫയർ അസോസിയേഷൻ പ്രവർത്തകരാണ് റെയിൽവേ മന്ത്രിക്ക് നിവേദനം അയച്ചത്. കോവിഡ് കാലത്ത് വർക്കലയിൽ നിർത്തലാക്കിയ ഗുരുവായൂർ-ചെന്നൈ എഗ്മോർ എക്സ്​പ്രസ്, മംഗലാപുരം-തിരുവനന്തപുരം എക്സ്​പ്രസ് എന്നിവയുടെ സ്റ്റോപ് വീണ്ടും അനുവദിച്ച് കിട്ടണമെന്ന ആവശ്യം ഉന്നയിച്ചാണ് റെയിൽവേ മന്ത്രി, റെയിൽവേ ബോർഡ് ചെയർമാൻ, ജനറൽ മാനേജർ, ഡിവിഷനൽ റെയിൽവേ മാനേജർ, എം.പി എന്നിവർക്ക് നിവേദനം അയച്ചത്. ഗുരുവായൂർ നിന്നുവരുന്ന യാത്രക്കാർക്കും തമിഴ്നാട്ടിലേക്ക് പോകുന്ന യാത്രക്കാർക്കും ഈ രണ്ട് ട്രെയിനുകൾക്കും സ്റ്റോപ്പില്ലാത്തതുമൂലം വളരെയേറെ ബുദ്ധിമുട്ടുകളാണ് നേരിടുന്നത്. പുലർച്ചെ ചെറുകിട വ്യാപാരികൾ തിരുവനന്തപുരത്ത് പോയി സാധന സാമഗ്രികൾ വാങ്ങി തിരികെ പരശുരാം എക്സ്​പ്രസിൽ വരുന്ന പതിവും സ്റ്റോപ്പില്ലാത്തതുമൂലം നിലച്ചു. 11 പാസഞ്ചർ ട്രെയിനുകൾ ഓടിക്കൊണ്ടിരിക്കുന്നിടത്ത് അഞ്ചായി കുറഞ്ഞു. എല്ലാ പാസഞ്ചർ ട്രെയിനുകളും കാപ്പിൽ, ഇടവ അകത്തുമുറി സ്റ്റേഷനുകളിലെ സ്റ്റോപ് പുനരാരംഭിക്കണമെന്നും നിവേദനത്തിൽ ആവശ്യപ്പെടുന്നുണ്ട്. വർക്കല പോസ്റ്റ് ഓഫിസ് അങ്കണത്തിൽ നടന്ന യോഗത്തിൽ അസോസിയേഷൻ പ്രസിഡന്‍റ്​ സി. പ്രസന്നകുമാർ, ലൈന കണ്ണൻ, ബ്രഹ്മാസ് മോഹനൻ, സപ്രു, സുനിൽ വി. ദേവ്, അരുൺ വർക്കല തുടങ്ങിയവർ പങ്കെടുത്തു.