ഇന്ധന വിലവർധന; പ്രതിഷേധ പരിപാടികൾ വിജയിപ്പിക്കണം -കോടിയേരി

തിരുവനന്തപുരം: ഇന്ധന വിലവർധനക്കെതിരെ ഏപ്രിൽ രണ്ടിന്​ നടത്തുന്ന പ്രതിഷേധ പരിപാടികൾ വിജയിപ്പിക്കണമെന്ന് സി.പി.എം സംസ്​ഥാന സെക്രട്ടറി കോടിയേരി ബാലകൃഷ്ണൻ. ആഗോളവത്​കരണ നയങ്ങൾ ആരംഭിക്കുംമുമ്പ് ലിറ്ററിന് 9.8 രൂപയായിരുന്നു രാജ്യത്തെ പെട്രോളി‍ൻെറ വില. ഇന്ന് അത് 100 രൂപ കടന്നിരിക്കുന്നു. ഡീസൽ വില ലിറ്റിന് 4.8 രൂപയായിരുന്നത് 100 രൂപക്ക്​ അരികിലെത്തി. സമാന സ്​ഥിതിയാണ് പാചകവാതക കാര്യത്തിലുമുള്ളത്. രണ്ടാം യു.പി.എ സർക്കാർ പെട്രോളി‍ൻെറ വിലനിയന്ത്രണം നീക്കംചെയ്തു. എൻ.ഡി.എ സർക്കാർ ഡീസലി‍ൻെറ വിലനിയന്ത്രണവും എടുത്തുമാറ്റി. സബ്സിഡിയുടെ ഭാരം കുറക്കാനെന്ന് പ്രഖ്യാപിച്ചായിരുന്നു ഈ നടപടികൾ. ഏപ്രിൽ രണ്ടിന്​ വൈകീട്ട്​ അഞ്ചുമുതൽ ഏഴുവരെ ലോക്കൽ കമ്മിറ്റി പരിധിയിൽ നടക്കുന്ന പ്രതിഷേധ ധർണ വിജയിപ്പിക്കാൻ മുഴുവൻ പേരും രംഗത്തിറങ്ങണമെന്ന് കോടിയേരി പ്രസ്​താവനയിൽ കൂട്ടിച്ചേർത്തു.