യു.എ.പി.എ കേസിൽ അപ്പീൽ: സംസ്ഥാന സർക്കാർ പിന്മാറണമെന്ന്​ സാംസ്കാരിക പ്രവർത്തകർ

തിരുവനന്തപുരം: കീഴ്​കോടതികളിൽനിന്ന്​ ജാമ്യം ലഭിച്ച യു.എ.പി.എ കേസുകളിൽ സുപ്രീംകോടതിയിൽ അപ്പീൽ പോകാനുള്ള നീക്കത്തിൽനിന്ന്​ സംസ്ഥാന സർക്കാർ പിന്മാറണമെന്ന്​ സാംസ്കാരിക, മനുഷ്യാവകാശ പ്രവർത്തകർ. യു.എ.പി.എ നിയമം കൊണ്ടുവന്ന സമയത്ത് അന്യായ കേസുകളും അറസ്റ്റും തടയാൻ വിചാരണ ആരംഭിക്കുംമുമ്പ്​ ലഭ്യമായ തെളിവും വസ്തുതകളും സർക്കാർ സ്വതന്ത്ര പരിശോധനക്ക് വിധേയമാക്കണമെന്ന വ്യവസ്ഥകൂടി ഉൾപ്പെടുത്തിയിരുന്നു. പരിശോധന അനന്തമായി നീളാതിരിക്കാൻ സമയക്രമവും നിശ്ചയിച്ചിരിക്കുന്നു. ഈ സമയക്രമം കർശനമായി പാലിക്കണമെന്ന് വിധിച്ചുകൊണ്ടാണ് കേരള ഹൈകോടതി, തടവിൽ കഴിയുന്ന രൂപേഷിനെ മൂന്ന് ​കേസുകളിൽ കുറ്റമുക്തനാക്കിയത്. ഹൈകോടതി സിംഗ്​ൾ ബെഞ്ച് മുമ്പ്​ ഇതേ കാരണത്താൽ ഈ കേസുകളിൽ കുറ്റമുക്തനാക്കിയെങ്കിലും കേരളം സുപ്രീംകോടതിയിൽ അപ്പീൽ പോയി. ഇനിയും അപ്പീലിനു പോകാതെ വിധി സ്വീകരിക്കാന്‍ സർക്കാര്‍ സന്നദ്ധമാകണമെന്ന്​ ബി.ആർ.പി. ഭാസ്‌കർ, സച്ചിദാനന്ദൻ, ഡോ. പി.കെ. പോക്കർ, ബി. രാജീവൻ, ഡോ. ആസാദ്, ടി.ടി. ശ്രീകുമാർ, കുസുമം ജോസഫ്, ഡോ. ജെന്നി റൊവീന, കെ.ടി. റാംമോഹൻ, സാറ ജോസഫ്, എം.എൻ. രാവുണ്ണി, സതി അങ്കമാലി, സജീദ് ഖാലിദ്, കെ. അജിത, ആർ. അജയൻ, കെ.എസ്. ഹരിഹരൻ, അംബിക, എം. സുൽഫത്ത്, സോണിയ ജോർജ്, ​ഡോ. എം.എം. ഖാൻ, എ.എം. നദ്‌വി, കെ.പി. സേതുനാഥ്‌, അഡ്വ. മധുസൂദനൻ, അഡ്വ. ഭദ്രകുമാരി, അഡ്വ. സുഗതൻ പോൾ, ശ്രീജ നെയ്യാറ്റിൻകര, പ്രമോദ് പുഴങ്കര, ജോളി ചിറയത്ത്, റെനി ഐയിലിൻ, മാഗ്ലിൻ ഫിലോമിന, അലൻ ഷുഹൈബ്, താഹ ഫസൽ എന്നിവർ സംയുക്ത പ്രസ്താവനയിൽ ആവശ്യപ്പെട്ടു.