ബിരിയാണി ചലഞ്ച് ഒരുക്കി 'തണൽ'

കഴക്കൂട്ടം: ജീവകാരുണ്യ പ്രവർത്തനങ്ങളുടെ നടത്തിപ്പിനായി 'തണൽ' പെരുമാതുറയിൽ ബിരിയാണി ചലഞ്ച് സംഘടിപ്പിച്ചു. പെരുമാതുറയിൽ പ്രവർത്തിക്കുന്ന ഡയാലിസിസ് സെന്‍ററിനും നിരാലംബരായ തെരുവിൽ കഴിയുന്നവരുടെ ചെലവുകൾക്കുമായാണ് ബിരിയാണി ചലഞ്ച് നടത്തിയത്. പതിനായിരത്തോളം ബിരിയാണിപ്പൊതികൾ പെരുമാതുറയിലേയും പരിസരപ്രദേശങ്ങളിലേയും വീടുകളിൽ എത്തിച്ചു. വിവിധ പ്രദേശങ്ങളിൽ പ്രവർത്തകർ കഴിഞ്ഞ രണ്ടാഴ്ചയായി വീടുകൾ സന്ദർശിച്ച് ബിരിയാണിക്കുള്ള ഓർഡറുകൾ സ്വീകരിച്ചിരുന്നു. സാമ്പത്തികമായി പിന്നാക്കം നിൽക്കുന്ന 17 പേർക്ക് സൗജന്യമായി ഡയാലിസിസ് ചെയ്യുന്നു. അംഗപരിമിതമായ കുട്ടികൾക്ക് വ്യത്യസ്ത ​െതറാപ്പികൾ നൽകുന്നതിനും തണലിൽ സൗകര്യം ഒരുക്കിയിട്ടുണ്ട്. ഇതും സൗജന്യമാണ്. അഗതി മന്ദിരം, കുറഞ്ഞ ചെലവിൽ മരുന്നുകൾ ലഭ്യമാക്കാൻ തണൽ ഫാർമസി എന്നിവയും പ്രവർത്തിക്കുന്നു.