മണ്ണ്​ മാഫിയയിൽനിന്ന്​ കൈക്കൂലി; തിരുവല്ലം സി.ഐക്ക്​ സസ്​പെൻഷൻ

തിരുവനന്തപുരം: മണ്ണ്​ മാഫിയയിൽനിന്ന്​ കൈക്കൂലി വാങ്ങിയെന്ന ആ​രോപണത്തിന്‍റെ അടിസ്ഥാനത്തിൽ തിരുവല്ലം സി.ഐ സുരേഷ്​ വി. നായരെ അന്വേഷണവിധേയമായി സസ്​പെൻഡ്​ ചെയ്തു. പിടിച്ചെടുത്ത വാഹനങ്ങൾ അമ്പലത്തറ, കമലേശ്വരം, തിരുവല്ലം ഭാഗങ്ങളിലുള്ള മണ്ണ്​ മാഫിയയിൽനിന്ന്​ ലക്ഷങ്ങൾ കൈക്കൂലി വാങ്ങി വിട്ടുകൊടുക്കുന്നുവെന്ന ആരോപണത്തെ തുടർന്നാണ്​ നടപടി​. ദമ്പതികളെ ആക്രമിച്ച കേസിലെ പ്രതി സുരേഷ്​ കുമാർ കസ്റ്റഡിയിൽ മരിച്ച സംഭവത്തിലും സി.ഐ ആരോപണവിധേയനായിരുന്നു. സംഭവവുമായി ബന്ധപ്പെട്ട്​ രണ്ട്​ എസ്​.ഐ​മാരെയും ഗ്രേഡ്​ എസ്​.ഐ​െയയും സസ്​പെൻഡ്​​ ചെയ്യുകയും സി.ഐ സുരേഷ്​ വി. നായർക്ക്​ കാരണം കാണിക്കൽ നോട്ടീസ്​ നൽകുകയും ചെയ്തിരുന്നു. അതിന്​ പിന്നാലെയാണ്​ തിരുവല്ലം പൊലീസ്​ സ്​റ്റേഷനുമായി ബന്ധപ്പെട്ട്​ കൈക്കൂലി ആരോപണം ശക്തമായത്​. സ്​പെഷൽ ബ്രാഞ്ച്​ റിപ്പോർട്ടിന്‍റെ അടിസ്ഥാനത്തിലാണ്​ സസ്​പെൻഷൻ​. സംസ്ഥാനത്ത്​ ഏറ്റവും കൂടുതൽ കൈക്കൂലി വാങ്ങുന്ന സ്​റ്റേഷനുകളിലൊന്നാണ്​ തിരുവല്ലമെന്നാണ്​ സ്​പെഷൽബ്രാഞ്ച്​ റിപ്പോർട്ടിലുള്ളത്​​. സി.ഐ ഉൾപ്പെടെ ചില ഉദ്യോഗസ്ഥർ മണ്ണ്​ മാഫിയയിൽനിന്ന്​ കൈക്കൂലി വാങ്ങുന്നുണ്ടെന്നും അതിനായി ഏജന്‍റുമാർ പ്രവർത്തിക്കുന്നുണ്ടെന്നുമായിരുന്നു കണ്ടെത്തൽ. സി.ഐയുടെ പൊതുജനങ്ങളോടുള്ള പെരുമാറ്റവും മോശമാണെന്ന്​ ക​ണ്ടെത്തിയിട്ടുണ്ട്​. സി.ഐക്ക്​ കൈക്കൂലി നൽകാത്ത വാഹനങ്ങൾ ദിവസങ്ങളോളം സ്​റ്റേഷനിൽ പിടിച്ചിടുകയും കൈക്കൂലി നൽകുകയാണെങ്കിൽ ചെറിയ തുക പിഴ ഈടാക്കി വാഹനം വിട്ടയക്കുകയാണ്​. നേര​േത്ത ഇതുസംബന്ധിച്ച പരാതികൾ ഉന്നത ഉദ്യോഗസ്ഥർക്ക്​ ലഭിച്ചിരുന്നെങ്കിലും നടപടി സ്വീകരിച്ചിരുന്നില്ല. തിരുവല്ലം സ്​റ്റേഷൻ പരിധിയിൽ നിത്യേന കുറഞ്ഞത്​ 40 ലോറികൾ മണ്ണിടിച്ച്​ കടത്തുന്നുണ്ടെന്നാണ്​ ക​ണ്ടെത്തൽ. ഒരു ലോറിയിൽനിന്ന്​ കുറഞ്ഞത്​ 10,000 രൂപ വീതം കൈക്കൂലി വാങ്ങുന്നതായാണ്​ വിവരം. സുരേഷ്​ വി. നായർക്കെതിരെ വകുപ്പുതല അന്വേഷണം തുടരുമെന്നും ഉചിതമായ തുടർനടപടികൾ കൈക്കൊള്ളുമെന്നും ആഭ്യന്തരവകുപ്പ്​ വൃത്തങ്ങൾ പറഞ്ഞു. സ്വന്തം ലേഖകൻ ​