ജില്ലയിലെ കെ-റെയിൽ സർവേക്കല്ലുകൾ ഏപ്രിൽ ഒന്നിന്​ പിഴുതുമാറ്റുമെന്ന്​ ബി.ജെ.പി

തിരുവനന്തപുരം: ജില്ലയില്‍ സ്ഥാപിച്ചിട്ടുള്ള മുഴുവന്‍ കെ-റെയില്‍ സര്‍​വേക്കല്ലുകളും ഏപ്രില്‍ ഒന്നിന്​ രാവിലെ 11ന് അതത്​ ബൂത്തുകളിലുള്ള പ്രവര്‍ത്തകരുടെ നേതൃത്വത്തില്‍ പിഴുതുമാറ്റുമെന്നും അവ മന്ത്രിമാരുടെയും ജില്ലയിലെ 13 എം.എൽ.എമാരുടെയും വീടുകളിൽ സ്ഥാപിക്കുമെന്നും​ ബി.ജെ.പി ജില്ല പ്രസിഡന്‍റ്​ വി.വി. രാജേഷ്. ക്ലിഫ്​ഹൗസിൽ​ പ്രതിഷേധ സൂചകമായി കല്ലുകൾ സ്ഥാപിച്ചത്​ ഇതിന്‍റെ ഭാഗമായാണ്​. സാധാരണക്കാരുടെ കിടപ്പാടം നഷ്ടപ്പെടുന്ന പദ്ധതി അനുവദിക്കില്ല. കെ-റെയില്‍ സർവേക്കല്ലുകൾ പിഴുതെടുത്ത് മുഖ്യമന്ത്രിയുടെ ഔദ്യോഗിക വസതിയായ ക്ലിഫ് ഹൗസിലേക്ക്​ നടത്തിയ മാർച്ചിൽ സംസാരിക്കുകയായിരുന്നു അദ്ദേഹം. ക്ലിഫ്ഹൗസിനു മുന്നിലെ ധര്‍ണ ബി.ജെ.പി സംസ്ഥാന ജനറല്‍ സെക്രട്ടറി അഡ്വ.പി. സുധീര്‍ ഉദ്ഘാടനം ചെയ്തു. പിണറായി വിജയന്‍ കേരളത്തില്‍ ഭരണകൂട ഭീകരത അഴിച്ചുവിടുകയാണെന്ന് അദ്ദേഹം പറഞ്ഞു. യുവമോര്‍ച്ച സംസ്ഥാന അധ്യക്ഷന്‍ പ്രഫുല്‍ കൃഷ്ണ സംസാരിച്ചു.