യൂത്ത് കോൺഗ്രസ് രാജ്ഭവൻ മാർച്ചിൽ സംഘർഷം

* പൊലീസും പ്രവർത്തകരുമായി ഉന്തും തള്ളും, ജലപീരങ്കി പ്രയോഗിച്ചു തിരുവനന്തപുരം: കെ- റെയിലിനെതിരെയുള്ള പ്രതിഷേധത്തിനിടയിൽ ഡൽഹിയിൽ യു.ഡി.എഫ് എം.പിമാരെ പൊലീസ് ആക്രമിച്ചതിൽ പ്രതിഷേധിച്ച്​ യൂത്ത് കോൺഗ്രസ് ജില്ല കമ്മിറ്റി നടത്തിയ രാജ്ഭവൻ മാർച്ചിൽ സംഘർഷം. തുടർന്ന്​ പൊലീസ് ജലപീരങ്കി പ്രയോഗിച്ചു. ഉച്ചക്ക്​ ഒന്നോടെ ആരംഭിച്ച പ്രകടനം രാജ്ഭവന്​ സമീപം ബാരിക്കേഡ് കെട്ടി പൊലീസ് തടഞ്ഞു. ബാരിക്കേഡ് മറിച്ചിട്ട് മുന്നോട്ട് പോകാൻ പ്രവർത്തകർ ശ്രമിച്ചതോടെയാണ്​ പൊലീസ് ജലപീരങ്കി പ്രയോഗിച്ചത്​. തുടർന്നും പ്രവർത്തകർ മുന്നോട്ട് പോകാൻ ശ്രമിച്ചത് പൊലീസുമായുള്ള ഉന്തിലും തള്ളിലും വാക്കേറ്റത്തിലും കലാശിച്ചു. മുദ്രാവാക്യം വിളികളുമായി പ്രവർത്തകർ തള്ളിക്കയറിയതോടെ വീണ്ടും ജലപീരങ്കി പ്രയോഗിച്ചു. ഇതോടെ പ്രവർത്തകർ റോഡിൽ കുത്തിയിരുന്നു പ്രതിഷേധിച്ചു. മാർച്ചിൽ പ്രധാനമന്ത്രി നരേന്ദ്ര മോദിയുടെ കോലം കത്തിച്ചു. ജില്ല പ്രസിഡന്‍റ്​ സുധീർ ഷാ പാലോട്, സംസ്ഥാന വൈസ് പ്രസിഡന്‍റ്​ എൻ.എസ്. നുസൂർ, എസ്.എം. ബാലു, സംസ്ഥാന ഭാരവാഹികളായ ജെ.എസ്. അഖിൽ, ഷജീർ നേമം, വിനോദ് കോട്ടുകാൽ, എസ്.പി. അരുൺ , അജയ് കുര്യാത്തി, ടി. ആർ. രാജേഷ് എന്നിവർ സംസാരിച്ചു. ജില്ല ഭാരവാഹികളായ രാജീവ് കരകുളം, പ്രമോദ്, അനൂപ്‌ പാലിയോട്, ഷാലിമാർ, മാഹീൻ പഴഞ്ചിറ, എസ്.കെ. അഭിജിത്, ഷമീർഷാ, സുഹൈൽ ഷാജഹാൻ, പ്രശോബ് തുടങ്ങിയവർ നേതൃത്വം നൽകി.