പാഴാക്കുന്ന വിഭവങ്ങൾ മറ്റൊരാൾക്ക്​ അവകാശപ്പെട്ടതാണെന്ന ബോധ്യം ഉണ്ടാകണം -​മുഖ്യമന്ത്രി

തിരുവനന്തപുരം: നമ്മൾ പാഴാക്കുന്ന വിഭവങ്ങൾ മറ്റൊരാൾക്ക്​ അവകാശപ്പെട്ടതാണെന്ന ബോധ്യം ഓരോരുത്തരിലും ഉണ്ടാകണമെന്ന്​ മുഖ്യമന്ത്രി പിണറായി വിജയൻ. ലോക ഉപഭോക്​തൃ അവകാശ ദിനാചരണത്തിന്‍റെ സംസ്ഥാനതല ഉദ്​ഘാടനവും സർക്കാറിന്‍റെ ഒന്നാം വാർഷികത്തിന്‍റെ ഭാഗമായി സംസ്ഥാന ​​പൊതുവിതരണ ഉപഭോക്​തൃകാര്യവകുപ്പ്​ നടപ്പാക്കുന്ന അഞ്ച്​ പദ്ധതികളുടെ ഉദ്​ഘാടനവും നിർവഹിക്കുകയായിരുന്നു അദ്ദേഹം. പുതിയ ഉപഭോക്​തൃസംരക്ഷണ നിയമം നടപ്പായതോടെ സംസ്ഥാനത്ത്​ മെച്ചപ്പെട്ട ഉപഭോക്​തൃ സൗഹൃദാന്തരീക്ഷം രൂപപ്പെട്ടിട്ടുണ്ട്​. സമ്പൂർണ ഉപഭോക്​തൃ സൗഹൃദ സംസ്ഥാനമായി കേരളത്തെ മാറ്റാനുള്ള ശ്രമമാണ്​ ഇപ്പോൾ നടക്കുന്നത്​. 2024ഓടെ ആഗോളതലത്തിൽ ഡിജിറ്റൽ ധനമേഖല കൂടുതൽ ശക്തമാകും. ഡിജിറ്റൽ ധനകാര്യമേഖലയിൽ നൂതന അവസരങ്ങൾ വരുമ്പോൾതന്നെ അത് ഉയർത്തുന്ന വെല്ലുവിളികളും അപകടങ്ങളും കാണേണ്ടതുണ്ട്. ഡിജിറ്റൽ പണമിടപാടുമായി ബന്ധപ്പെട്ട ചതിക്കുഴികൾ മുന്നിൽക്കണ്ട് കരുതലോടെ നീങ്ങണമെന്നും മുഖ്യമന്ത്രി ആവശ്യപ്പെട്ടു. പൊതുവിതരണ ഉപഭോക്​തൃകാര്യവകുപ്പ്​ ഓഫിസുകളിലെ സമ്പൂർണ ഡിജിറ്റലൈസേഷൻ സംവിധാനം, ​പൊതുവിതരണ സംവിധാനത്തിൽ ഭക്ഷ്യധാന്യങ്ങളുടെ ചരക്കുനീക്കം നിരീക്ഷിക്കുന്നതിനുള്ള ജി.പി.എസ്​ സംവിധാനം, റേഷൻ കടകൾ ഡിജിറ്റലായി പരിശോധിക്കുന്നതിനുള്ള മൊബൈൽ ആപ്ലിക്കേഷൻ, ചെറുകിട വ്യാപാരസ്ഥാപനങ്ങളിലെ ബില്ലിങ്​-അളവുതൂക്ക സംവിധാനങ്ങൾ പരിശോധിക്കുന്നതിന്​ 'ജാഗ്രത' പദ്ധതി, പെട്രോൾ പമ്പുകളിൽ കൃത്യമായ അളവ്​ ഉറപ്പുവരുത്തുന്നതിനുള്ള'ക്ഷമത' പദ്ധതി എന്നിവയാണ്​ ചടങ്ങിൽ മുഖ്യമന്ത്രി ഉദ്​ഘാടനം ചെയ്തത്​. മന്ത്രി ജി.ആർ. അനിൽ അധ്യക്ഷതവഹിച്ചു. മന്ത്രിമാരായ വി. ശിവൻകുട്ടി, ആന്‍റണി രാജു, റിട്ട. ജസ്റ്റിസ്​ കെ. സുരേന്ദ്ര മോഹൻ, സപ്ലൈകോ സി.എം.ഡി ഡോ. സൻജീവ്​ പട്​ജോഷി, പൊതുവിതരണ ഉപഭോക്​തൃ കമീഷണർ ഡോ. ഡി. സജിത്​ബാബു എന്നിവർ സംസാരിച്ചു.