തേമ്പാമൂട് ഇരട്ടക്കൊലക്കേസിൽ​ പുനരന്വേഷണം വേണം -ആനാട് ജയൻ

നെടുമങ്ങാട്: വെഞ്ഞാറമൂട് ഇരട്ടക്കൊലപാതക കേസിൽ പുനരന്വേഷണത്തിന്​ സർക്കാറും ആഭ്യന്തരവകുപ്പും തയാറാകണമെന്ന് മുൻ കെ.പി.സി.സി നിർവാഹകസമിതി അംഗം ആനാട് ജയൻ ആവശ്യപ്പെട്ടു. കൊലപാതകം നടക്കുമ്പോൾ സി.പി.എം ലോക്കൽ കമ്മിറ്റി സെക്രട്ടറിയും ഏരിയ കമ്മിറ്റി അംഗവുമായിരുന്ന ഇപ്പോഴത്തെ സി.പി.ഐ നേതാവ് ഡി. സുനിൽ ഫേസ്​ ബുക്കിലൂടെ നടത്തിയ വെളിപ്പെടുത്തൽ ഞെട്ടിക്കുന്നതാണ്. സ്ഥലം എം.എൽ.എയുടെ മകനും ചില ചെറുപ്പക്കാരും തമ്മിലെ സംഘർഷവും തുടർന്ന് തിരുവോണത്തിന് തലേദിവസം ഇവരെ ആക്രമിക്കാൻ ക്വട്ടേഷൻ നൽകിയതും സംബന്ധിച്ചാണ്​ വെളിപ്പെടുത്തൽ. സ്ഥലം എം.എൽ.എയെ തടഞ്ഞ്​ ചീത്തവിളിച്ചതുമായി ബന്ധപ്പെട്ട്‌ എം.എൽ.എയും ഡിവൈ.എഫ്.ഐ നേതാവും തമ്മിലെ ചേരിപ്പോരും കൊലപാതകങ്ങൾക്ക് കാരണമായി. കൊലപാതകങ്ങൾ കോൺഗ്രസിനുമേൽ കെട്ടിവെക്കാൻ സി.പി.എം നേതൃത്വം നടത്തിയ ശ്രമം സത്യത്തെ തമസ്കരിക്കാൻ വേണ്ടി മാത്രമായിരുന്നെന്നും ആനാട് ജയൻ പറഞ്ഞു.