സമുദ്രതീരത്തെ പ്ലാസ്​റ്റിക്​ മാലിന്യ സംസ്കരണം; കേരള സർവകലാശാല ഗവേഷണ പദ്ധതിക്ക്​ ആസ്​ട്രേലിയൻ സഹായം

തിരുവനന്തപുരം: കേരളത്തിന്‍റെ തെക്കൻ സമുദ്രതീരത്തെ പ്ലാസ്റ്റിക്​ മാലിന്യങ്ങൾ സുസ്ഥിരമായി കൈകാര്യം ചെയ്യാൻ ലക്ഷ്യമിടുന്ന ഗവേഷണ പദ്ധതിക്ക്​ ആസ്​ട്രേലിയൻ സർക്കാറിന്‍റെ ധനസഹായം. സർവകലാശാലയിലെ പരിസ്ഥിതിശാസ്ത്ര വിഭാഗം മേധാവി പ്രഫ. സലോം ജ്ഞാന തങ്കയുടെ നേതൃത്വത്തിലുള്ള ഗവേഷണ പദ്ധതിക്കാണ്​ ഡയറക്ട്​ എയ്​ഡ്​ പ്രോഗ്രാം (ഡി.എ.പി) ഗ്രാന്‍റ് ലഭിച്ചത്​. സർവകലാശാല ആസ്ഥാനത്ത്​ സന്ദർശനത്തിനെത്തിയ ഇന്ത്യയിലെ ആസ്‌ട്രേലിയൻ ഹൈകമീഷണർ ബാരി ഒഫാരെൽ എ.ഒ ഗ്രാൻറ്​ പ്രഖ്യാപനം നടത്തി. ഇന്ത്യയും ആസ്​ട്രേലിയയും തമ്മിൽ വിദ്യാഭ്യാസ മേഖലയിൽ മികച്ച സഹകരണത്തിന്​ പദ്ധതി സഹായകരമാണെന്ന്​ ഹൈകമീഷണർ അഭിപ്രായപ്പെട്ടു. പ്ലാസ്റ്റിക്​ ഉൽപന്നങ്ങൾ ഉപയോഗക്ഷമതക്കു​ശേഷം മറ്റ്​ ഉൽപന്നങ്ങളാക്കി പലതവണ ഉപയോഗിക്കുന്ന (സർക്കുലർ ഇക്കോണമി) മാതൃകയിൽ അവശിഷ്ടങ്ങൾ കൈകാര്യം ചെയ്യണമെന്ന്​ പരിസ്ഥിതി ശാസ്ത്ര വിഭാഗം മേധാവി അഭിപ്രായപ്പെട്ടു. ഹൈകമീഷണറുടെ നേതൃത്വത്തിലുള്ള പ്രതിനിധി സംഘത്തിന്​ സർവകലാശാല ആസ്ഥാനത്ത്​ വൈസ്​ ചാൻസലർ ഡോ. വി.പി. മഹാദേവൻ പിള്ള, രജിസ്​ട്രാർ ഡോ. അനിൽ കുമാർ എന്നിവരുടെ നേതൃത്വത്തിൽ സ്വീകരണം നൽകി. ദക്ഷിണേന്ത്യ കോൺസൽ ജനറൽ സാറാ കിർലു, വൈസ് കോൺസൽ സാമുവൽ മിയേഴ്‌സ്, പ്രോഗ്രാം മാനേജർ കാർത്തികേയൻ വൈത്തീശ്വരൻ, ജാനകി ശ്രീറാം എന്നിവരും സംഘത്തിലുണ്ടായിരുന്നു.