കേരളത്തിന് അനുവദിക്കുന്ന തുക വകമാറ്റുന്നെന്ന്​ പരാതികള്‍ -​കേന്ദ്ര സഹമന്ത്രി

തിരുവനന്തപുരം: കേന്ദ്ര സാമൂഹിക നീതി വകുപ്പ് വിവിധ പദ്ധതികള്‍ക്കായി കേരളത്തിന് അനുവദിക്കുന്ന തുക വകമാറ്റി ചെലവഴിക്കുന്നതായി നിരവധി പരാതികള്‍ സംസ്ഥാനത്തുനിന്ന് ലഭിക്കുന്നുണ്ടെന്ന്​ കേന്ദ്ര സാമൂഹിക ക്ഷേമ സഹമന്ത്രി എ. നാരായണസ്വാമി വാര്‍ത്തസമ്മേളനത്തില്‍ കുറ്റപ്പെടുത്തി. പദ്ധതികള്‍ നടപ്പാക്കുന്നതില്‍ സംസ്ഥാന സര്‍ക്കാര്‍ ഗുരുതര വീഴ്ച വരുത്തുന്നു. പിന്നാക്ക ക്ഷേമ വികസനത്തിനായി കേരളത്തിന് അനുവദിക്കുന്ന കോടിക്കണക്കിന് രൂപയുടെ ഫണ്ട് യഥാസമയം വിനിയോഗിക്കാന്‍ സാധിക്കാത്തതിനാല്‍ നഷ്ടമാകുകയാണ്​. സംസ്ഥാനത്തിന് അനുവദിച്ച ഫണ്ട് ഏതൊക്കെ മേഖലയില്‍ വിനിയോഗിക്കണമെന്നും ഇതുവരെയുള്ള വിനിയോഗം സംബന്ധിച്ചും പരിശോധിക്കാൻ യോഗം ചേര്‍ന്നിരുന്നു. എന്നാൽ, ചീഫ് സെക്രട്ടറി പങ്കെടുത്തില്ല. മറ്റ്​ ഉദ്യോഗസ്ഥരാണ് യോഗത്തിനെത്തിയത്. ചീഫ് സെക്രട്ടറി പങ്കെടുക്കണമെന്ന് കാണിച്ച് നോട്ടീസ് നല്‍കും. ചീഫ് സെക്രട്ടറിയുടെ സാന്നിധ്യത്തില്‍ യോഗം വീണ്ടും ചേരുമെന്നും എ. നാരായണസ്വാമി പറഞ്ഞു. ബി.ജെ.പി സംസ്ഥാന ജനറല്‍ സെക്രട്ടറി ജോര്‍ജ് കുര്യന്‍, സെക്രട്ടറി അഡ്വ. ജെ. പത്മകുമാര്‍ എന്നിവരും വാര്‍ത്തസമ്മേളനത്തില്‍ സന്നിഹിതരായി.