'ആരിഫ് മുഹമ്മദ് ഖാന്‍റെ പ്രസ്താവന പദവിക്ക് നിരക്കാത്തത്'

തിരുവനന്തപുരം: ഹിജാബ് വിഷയത്തില്‍ ആരിഫ് മുഹമ്മദ് ഖാന്റെ പ്രസ്താവന ഗവര്‍ണര്‍ പദവിക്ക് നിരക്കാത്തതാണെന്ന്​ എസ്​.ഡി.പി.ഐ സംസ്ഥാന ജനറല്‍ സെക്രട്ടറി പി.കെ. ഉസ്മാന്‍. ഗവര്‍ണര്‍ പദവി ആർ.എസ്.എസിന്റെ പ്രവര്‍ത്തനത്തിനുവേണ്ടി ഉപയോഗിക്കരുത്​. പല പദവികളും അദ്ദേഹം നേടിയത് മുസ്​ലിം പേര് ഉപയോഗപ്പെടുത്തിയാണ്. അതേ സമൂഹംതന്നെ അദ്ദേഹത്തില്‍നിന്ന് അവഹേളനങ്ങളും പീഡനങ്ങളും നേരിടേണ്ടിവന്നിട്ടുണ്ട്. മതവിഷയത്തില്‍ അഭിപ്രായം പറയലല്ല ഗവര്‍ണറുടെ ഉത്തരവാദിത്തം. ശരീഅത്ത് വിഷയത്തിലുള്‍പ്പെടെ മുസ്​ലിം സമൂഹത്തിനെതിരെ നിലപാടെടുത്തിട്ടുള്ളയാളാണ്. ആർ.എസ്.എസിനുവേണ്ടി വിവരക്കേട് വിളമ്പുന്നതില്‍നിന്ന് ഗവർണർ പിന്മാറണമെന്നും അല്ലാത്തപക്ഷം ഉന്നതമായ ഭരണഘടന പദവി സ്വയം ഒഴിയാന്‍ തയാറാകണമെന്നും പി.കെ. ഉസ്മാന്‍ ആവശ്യപ്പെട്ടു.