തുമ്പ കടൽത്തീരത്ത് വീണ്ടും സ്രാവ് എത്തി

കഴക്കൂട്ടം: തുമ്പ കടൽത്തീരത്ത് വീണ്ടും കൂറ്റൻ സ്രാവ്​ എത്തി. തിങ്കളാഴ്ച ഉച്ചക്ക്​ ഒരു മണിക്കൂർ നീണ്ട പരിശ്രമത്തിനൊടുവിൽ മത്സ്യത്തൊഴിലാളികൾ സ്രാവിനെ തിരികെ കടലിലേക്ക് രക്ഷപ്പെടുത്തി വിട്ടു. തുടർച്ചയായ രണ്ടാം ദിവസമാണ് ഉടുമ്പൻ ഇനത്തിൽപ്പെട്ട സ്രാവ് കടൽത്തീരത്ത് എത്തിയത്​. നേരത്തേ, ഞായറാഴ്ച ഉച്ചയോടെ ബീമാപള്ളി സ്വദേശി ഷാഹുലിന്‍റെ വലയിൽ കുടുങ്ങി തുമ്പ ആറാട്ടുവഴിയിൽ കരക്കെത്തിയ മറ്റൊരു സ്രാവിനെ കുടുങ്ങിക്കിടന്ന വലയുടെ കുടുക്ക് അറുത്ത് കടലിലേക്ക്​ തള്ളിയിറക്കാൻ മത്സ്യത്തൊഴിലാളികൾ ശ്രമം നടത്തിയെങ്കിലും വിജയിച്ചില്ല. ഇത്​ പിന്നീട്​ ചത്തടിഞ്ഞിരുന്നു. കമ്പവലയിൽ കുടുങ്ങിയ രണ്ടായിരം കിലോയോളം തൂക്കമുള്ള ആ സ്രാവ് ചെകിളയിൽ മണൽ കയറിയതിനാലാണ്​ ചത്തതെന്ന്​ കഠിനംകുളം മൃഗാശുപത്രിയിലെ ഡോക്ടർ സ്മിതയുടെ നേതൃത്വത്തിൽ എത്തിയ സംഘം നടത്തിയ പോസ്റ്റ്​​േമാർട്ടത്തിൽ വ്യക്​തമായിരുന്നു. ഇതിനെ പിന്നീട്​ കഴക്കൂട്ടം പൊലീസ്, കോസ്റ്റൽ പൊലീസ് എന്നിവരുടെ സാന്നിധ്യത്തിൽ കഠിനംകുളം പഞ്ചായത്ത് അംഗം ഡൊറിൽ ജേക്കബിന്‍റെ നേതൃത്വത്തിൽ തീരത്ത്​ കുഴിച്ചിട്ടു. തുടർച്ചയായ ദിവസങ്ങളിൽ സ്രാവ് കരക്കടിയുന്നതിൽ മത്സ്യത്തൊഴിലാളികളും ആശങ്കയിലാണ്.