ഓർഡിനൻസ്​ വിവാദം: സി.പി.എം സെക്രട്ടേറിയറ്റും അറിഞ്ഞില്ല

തിരുവനന്തപുരം: വിവാദ ഓർഡിനൻസിന്​​ മന്ത്രിസഭ അംഗീകാരം നൽകിയത്, ലോകായുക്ത ഭേദഗതി ബിൽ നിയമസഭയിൽ അവതരിപ്പിക്കുമ്പോൾ വിശദ ചർച്ച നടത്താമെന്ന്​ സി.പി.ഐ അടക്കം ഘടകകക്ഷികൾക്ക്​ മുഖ്യമന്ത്രി ഉറപ്പുനൽകിയ ശേഷം. മുഖ്യമന്ത്രിയുടെ ഉറപ്പിലാണ്​ ​തങ്ങളുമായി ചർച്ച നടത്താതെ ധൃതിപിടിച്ച്​​​ സർക്കാർ ഓർഡിനൻസ്​ ഇറക്കിയതെന്ന്​ സി.പി.ഐ സംസ്ഥാന നേതൃത്വം ആവർത്തിക്കുന്നു​. പൊതുഭരണ വകുപ്പും നിയമവകുപ്പും യോജിച്ച്​ കൊണ്ടുവന്ന ഭേദഗതി ഫലത്തിൽ സി.പി.എമ്മിനെയും സി.പി.ഐയെയും വെട്ടിലാക്കി. ഓർഡിനൻസ്​ വിവാദം എൽ.ഡി.എഫിലുണ്ടാക്കിയ പിണക്കം സമവായത്തിലൂടെ പരിഹരിക്കുക എന്നത്​ വെല്ലുവിളിയായി അവശേഷിക്കുന്നു. ജനുവരി 11ലെ മന്ത്രിസഭായോഗത്തിൽ ഓർഡിനൻസ്​ അജണ്ടയായി ഉൾപ്പെടുത്തിയെങ്കിലും മാറ്റിവെച്ചു. 19ലെ യോഗത്തിൽ വിഷയം വീണ്ടും പരിഗണിച്ചപ്പോൾ ചർച്ച ചെ​യ്യേണ്ടത​ല്ലേ എന്ന്​ സി.പി.ഐ അടക്കം ഘടകകക്ഷികളിലെ മന്ത്രിമാർ സംശയം പ്രകടിപ്പിച്ചു. എന്നാൽ, ലോകായുക്ത ഭേദഗതി ബില്ല്​ നിയമസഭയിൽ കൊണ്ടുവരുമ്പോൾ വിശദമായി ചർച്ച ചെയ്യാമെന്ന്​ മുഖ്യമന്ത്രി വിശദീകരിച്ചതോടെ ഓർഡിനൻസ്​ കൊണ്ടുവരാനുള്ള തീരുമാനത്തിന്​ അംഗീകാരം നൽകി ഗവർണർക്ക്​ സമർപ്പിച്ചു. എന്നാൽ, രണ്ടുതവണ വിഷയം പരിഗണിച്ചിട്ടും സി.പി.എം സംസ്ഥാന സെക്രട്ടേറിയറ്റിൽ ഇതുസംബന്ധിച്ച്​ ചർച്ച നടന്നില്ല. ഓർഡിനൻസ്​ പുറപെടുവിച്ച ശേഷമുള്ള സെക്രട്ടേറിയറ്റിലായിരുന്നു ചർച്ച. പാർട്ടി കേന്ദ്രത്തെ അറിയിക്കുന്നതിൽ ജാഗ്രതക്കുറവുണ്ടായെന്ന വിമർശനമാണ്​ സി.പി.ഐ മന്ത്രിമാർക്കെതിരെ​ സംസ്ഥാന നിർവാഹക സമിതിയിലുണ്ടായത്​. എന്നാൽ, ബിൽ​ വിശദമായി ചർച്ചചെയ്യാമെന്ന്​ ഉറപ്പുനൽകിയിട്ടും സി.പി.ഐ മുന്നോട്ടുവെക്കുന്ന ഉടക്ക്​ അനാവശ്യമാണെന്നാണ്​ സി.പി.എമ്മിന്‍റെ ആക്ഷേപം. നിയമം കൊണ്ടുവരുമ്പോൾ ചർച്ച ചെയ്യാമെന്ന് സമ്മതിക്കുമ്പോൾ തന്നെ ഭേദഗതിയിലൂടെ നീക്കംചെയ്ത ലോകായുക്ത നിയമത്തിലെ 14ാം വകുപ്പ്​ പുനഃസ്ഥാപിക്കണമെന്നതിൽ ഉറച്ചുനിൽക്കു​മോ എന്ന്​ സി.പി.ഐ നേതൃത്വം ഉറപ്പുനൽകുന്നുമില്ല. ചർച്ചയിലൂടെ പരിഹാരം ഉരുത്തിരിയുമെന്ന്​ മാത്രമാണ്​ സി.പി.ഐ വ്യക്തമാക്കുന്നത്​.