നൂറുദിന പരിപാടി: പ്രവാസികൾക്ക് വാഗ്​ദാനം മാത്രം -പ്രവാസി കോൺഗ്രസ്

തിരുവനന്തപുരം: സർക്കാറിന്റെ നൂറുദിന പരിപാടികളിൽ പ്രവാസികൾക്ക് നൽകിയത് വാഗ്​ദാനം മാത്രമാണെന്ന് പ്രവാസി കോൺഗ്രസ്​ ആരോപിച്ചു. കഴിഞ്ഞ ബജറ്റിൽ 3000 രൂപയായി വർധിപ്പിച്ച പെൻഷൻ നാളിതുവരെ നൽകിയില്ല. അടുത്ത ബജറ്റിലും പ്രഖ്യാപനം ആവർത്തിക്കാനാണ് ശ്രമം. വർധന മുൻകാല പ്രബല്യത്തോടെ നൽകണം. ബാങ്കുകൾ ഉൾപ്പെടെ സർക്കാർ ധനകാര്യ സ്ഥാപനങ്ങളിലെ പ്രവാസി പുനരധിവാസ വായ്പ പ്രഹസനമായി. തിരികെ വന്ന പ്രവാസികൾ വായ്പാ തിരിച്ചടവ് ശേഷിയില്ലാത്തവരെന്ന് മുദ്രകുത്തി മുൻവിധിയോടെ അപേക്ഷകൾ തള്ളുന്നു. നാളിതുവരെ ലഭിച്ച അപേക്ഷകളുടെയും ഇതിൽ നൽകിയ വായ്പയുടെയും കണക്ക് പുറത്തുവിടാൻ സർക്കാർ തയാറാകണമെന്ന്​ ഭാരവാഹികൾ ആവശ്യപ്പെട്ടു.