വാടകക്കാർക്കും തെരുവോരത്തുള്ളവർക്കും റേഷൻ കാർഡ്​

തിരുവനന്തപുരം: വാടകക്ക്​ താമസിക്കുന്നവർക്കും തെരുവിൽ അന്തിയുറങ്ങുന്നവർക്കും ട്രാൻസ്​​െജൻഡേഴ്​സിനും റേഷൻ കാർഡ്​ നൽകുമെന്ന്​ മന്ത്രി ജി.ആർ. അനിൽ. നിലവിലെ സാഹചര്യത്തിൽ ഒാണം ഫെയർ നടത്തുന്നത്​ ആലോചിക്കുന്നെന്നും ഭക്ഷ്യ വകുപ്പി​ൻെറ ധനാഭ്യർഥന ചർച്ചക്ക്​ മറുപടി പറഞ്ഞു. എല്ലാവർക്കും റേഷൻ കാർഡ്​ നൽകണ​മെന്നതാണ്​ സർക്കാർ നിലപാട്​. എന്നാൽ, ഉടമസ്ഥർ സർട്ടിഫിക്കറ്റ്​ നൽകാത്തത്​ കാരണം വാടകക്ക്​ താമസിക്കുന്നവർക്ക്​ കാർഡ്​ ലഭിക്കാത്ത സാഹചര്യമുണ്ട്​. ഇൗ സാഹചര്യത്തിൽ വാടകക്ക്​ താമസിക്കുന്നവർ നൽകുന്ന സത്യവാങ്​മൂലം സ്വീകരിച്ച്​ കാർഡ്​ നൽകും. ട്രാൻസ്​ജെൻഡേഴ്​സിന്​ റേഷൻ കാർഡും ഒാണത്തിന്​ സൗജന്യ കിറ്റും നൽകും. 14 ജില്ലകളിലും കിറ്റ്​ വിതരണം മുടങ്ങിയിട്ടില്ല. ഇല്ലാത്ത വിഷയം ഉന്നയിച്ച്​ പരിഭ്രാന്തി പരത്തുകയാണ്​. കിറ്റ്​ വിതരണത്തിൽ വീഴ്​ചയുണ്ടായിട്ടില്ല. വകുപ്പ്​ ഏലം സംഭരിച്ചതുമൂലം ഏലത്തിന്​ 200 രൂപ മുതൽ 300 രൂപ വരെ വില വർധനയുണ്ടായി. കശുവണ്ടിക്കും സമാന സ്ഥിതിയാണ്​. ഏലം പാക്കറ്റി​നെ കുറിച്ചും ഇല്ലാത്ത പ്രചാരണം നടത്തി. കിറ്റിനൊപ്പം നൽകുന്ന വാഴക്ക ഉപ്പേരി കുടുംബശ്രീ അംഗങ്ങളാണ്​ തയാറാക്കുന്നത്​. ഒാണത്തിന്​ 31 മാവേലി സ്​റ്റോറുകൾ സൂപ്പർ മാർക്കറ്റുകളായി മാറും. സാമൂഹിക നീതി വകുപ്പിൽ നിന്നുള്ള പട്ടിക അനുസരിച്ച്​ അഗതി മന്ദിരങ്ങൾക്കും കന്യാസ്​ത്രീ മഠങ്ങൾക്കും ഒാണക്കാലത്ത്​ സൗജന്യ ഭക്ഷ്യ കിറ്റ്​ നൽകും. കിറ്റിൽ അഴിമതിയാണെന്ന തെറ്റിദ്ധാരണ പരത്തരുത്​. ഇതുവരെ 10.16 കോടി കിറ്റ്​ 12 തവണയായി വിതരണം ചെയ്​തിട്ടുണ്ട്​. വിശപ്പ് ​രഹിത കേരളം പദ്ധതിയുടെ ഭാഗമായി 20 രൂപ ചെലവിൽ ഭക്ഷണം കിട്ടുന്ന പദ്ധതി എല്ലാ നിയോജക മണ്ഡലങ്ങളിലും ആരംഭിക്കും. സപ്ലൈകോ സി.എം.ഡി അസ്​ഗർ അലി പാഷക്കെതിരെ മുൻ ഭക്ഷ്യമന്ത്രി പി. തിലോത്തമൻ പരാതി നൽകിയെന്ന ആക്ഷേപം തെറ്റാണ്​. ഒാണത്തിനുശേഷം ഭക്ഷ്യകിറ്റ്​ നിർത്തുന്നെന്ന വാർത്ത തെറ്റാണ്​. വിള ആരംഭിക്കുന്ന സമയത്തു​തന്നെ നെല്ല്​ സംഭരണം നടത്താനാണ്​ ആലോചന. ഇക്കാര്യത്തിൽ കേന്ദ്ര വിജ്ഞാപനം ആവശ്യമാണെന്നും മന്ത്രി പറഞ്ഞു.