അഭയകേസ്​ പ്രതികൾക്ക്​ പരോൾ അനുവദിച്ചത്​ വിവാദത്തിൽ, പരാതി നൽകുമെന്ന്​ ​​ജോമോ​ൻ പുത്തൻപുരയ്​ക്കൽ

തിരുവനന്തപുരം: സുപ്രീംകോടതി ഉത്തരവി​ൻെറ പേരിലാണ്​ അഭയ കേസിലെ പ്രതികൾക്ക് പരോൾ നൽകിയതെന്ന പ്രചാരണം വ്യാജമാണെന്ന് അഭയകേസ് ആക്​ഷൻ കൗൺസിൽ കൺവീനർ ജോമോൻ പുത്തൻപുരയ്ക്കൽ. സിസ്​റ്റർ അഭയ കൊലക്കേസിലെ ഒന്നാം പ്രതി ഫാ. തോമസ് കോട്ടൂരിനും മൂന്നാം പ്രതി സിസ്​റ്റർ സെഫിക്കും കോവിഡ് രണ്ടാം തരംഗത്തി​ൻെറ മറവിൽ സുപ്രീംകോടതി ഉത്തരവുണ്ടെന്ന വ്യാജേനയാണ് 90 ദിവസം പരോൾ നൽകിയത്. എന്നാൽ, സുപ്രീംകോടതി ഉത്തരവിൽ ഏഴ് വർഷത്തിൽ താഴെ ശിക്ഷ ലഭിച്ചവർക്ക് മാത്രമേ പരോൾ അനുവദിച്ചിട്ടുള്ളൂ. എന്നാൽ, ഇരട്ട ജീവപര്യന്തം ശിക്ഷിച്ച പ്രതിക്കും ജീവപര്യന്തം ശിക്ഷിച്ച പ്രതിക്കും കോവിഡി​ൻെറ മറവിൽ പരോൾ നൽകിയതിനെതിരെ പരാതി നൽകുമെന്നും അദ്ദേഹം കൂട്ടിച്ചേർത്തു. ശിക്ഷ വിധിച്ച്, അഞ്ച് മാസം പോലും തികച്ച് ജയിലിൽ കഴിയുന്നതിന്​ മുമ്പാണ്​ രണ്ടുപേരും പരോൾ ലഭിച്ച്​ പുറത്തുപോയത്. അതേസമയം, ഫാ. തോമസ് കോട്ടൂരും സിസ്​റ്റർ സെഫിയും ഹൈകോടതിയിൽ നൽകിയ ജാമ്യഹരജി കഴിഞ്ഞ അഞ്ച് മാസത്തിനിടയിൽ അഞ്ച് പ്രാവശ്യവും ജസ്​റ്റിസ് കെ. വിനോദ് ചന്ദ്രൻ അധ്യക്ഷനായ ഡിവിഷൻ ബെഞ്ച് ജാമ്യം നൽകാതെ മാറ്റിവെച്ചിരിക്കുകയായിരുന്നു. പ്രതികൾക്ക് ജാമ്യം ലഭിക്കാനായി ഏതെങ്കിലും കോടതിയിൽ ഹരജി തീർപ്പാക്കാനുണ്ടെങ്കിൽ പരോൾ അനുവദിക്കാൻ പാടില്ലെന്ന പൊതുമാനദണ്ഡം പോലും അഭയ കേസിലെ പ്രതികൾക്ക് പരോൾ അനുവദിച്ചപ്പോൾ പരിഗണിച്ചില്ലെന്നും ജോമോൻ പറഞ്ഞു.