മത്സ്യത്തൊഴിലാളിയെ കാണാനില്ലെന്ന് പരാതി

വിഴിഞ്ഞം: തമിഴ്നാട്ടിലെ തേങ്ങാപ്പട്ടണത്തുനിന്ന് ഉൾക്കടലിൽ മീൻ പിടിക്കാൻ പോയ പുല്ലുവിള സ്വദേശിയായ മത്സ്യത്തൊഴിലാളി യുവാവിനെ കാണാനില്ലെന്ന് പരാതി. അന്വേഷണം ആരംഭിച്ചതായി അധികൃതർ അറിയിച്ചു. പുല്ലുവിള സ്വദേശി അഭിലാഷിനെയാണ്​ (32) കാണാതായത്. തിങ്കളാഴ്ച വൈകീട്ട്​ മൂന്നരയോടെ തമിഴ്നാട് സ്വദേശിയുടെ ജീസസ്​ എന്ന ബോട്ടിലാണ് അഭിലാഷ് ഉൾപ്പെടെയുള്ള ഒമ്പതംഗ സംഘം കടലിലേക്ക് പുറപ്പെട്ടത്. ലക്ഷദ്വീപ് മേഖലയിൽനിന്ന് കൊഞ്ച് പിടിക്കുകയായിരുന്നു ലക്ഷ്യം. എന്നാൽ, യാത്രക്കിടയിൽ രാത്രി ഒമ്പതോടെ നീരോടിയിൽനിന്ന് എട്ട് നോട്ടിക്കൽ മൈൽ ഉൾക്കടലിൽ​െവച്ച് അഭിലാഷിനെ കാണാതാകുകയായിരുന്നെന്നാണ് കൂടെയുള്ളവർ അധികൃതരെ അറിയിച്ചത്. കുളച്ചൽ തീരദേശ പൊലീസും കോസ്​റ്റ്​ ഗാർഡും തിരച്ചിൽ നടത്തിയെങ്കിലും ഫലമുണ്ടായില്ല. ബോട്ടിൽ സഞ്ചരിക്കുന്നതിനിടയിൽ അഭിലാഷ് കടലിൽ വീണിരിക്കാമെന്നാണ് കരുതുന്നതെന്ന്​ അധികൃതർ പറഞ്ഞു.