ദേശീയ വിദ്യാഭ്യാസനയം അടിച്ചേല്‍പിക്കുന്നത് ഭരണഘടന വിരുദ്ധം -പ്രഭാത് പട്​നായക്​

തിരുവനന്തപുരം: കണ്‍കറൻറ്​ ലിസ്​റ്റിലുള്ള വിദ്യാഭ്യാസം സംബന്ധിച്ച നയപരമായ തീരുമാനങ്ങള്‍ സംസ്ഥാനങ്ങളുമായി ആലോചിക്കാതെ നടപ്പാക്കുന്നത് ഭരണഘടന ലംഘനമാണെന്ന് പ്രഫ. പ്രഭാത് പട്​നായക്​. ദേശീയ വിദ്യാഭ്യാസനയം സംബന്ധിച്ച് പഠിക്കാന്‍ ഉന്നതവിദ്യാഭ്യാസ കൗണ്‍സില്‍ നിയോഗിച്ച കമ്മിറ്റി റിപ്പോര്‍ട്ട് പുറത്തിറക്കി സംസാരിക്കുകയായിരുന്നു അദ്ദേഹം. വികേന്ദ്രീകൃത സമീപനത്തിന് പ്രാമുഖ്യമുള്ള ഫെഡറല്‍ തത്വങ്ങളാണ് ഇന്ത്യന്‍ ഭരണഘടന അനുശാസിക്കുന്നതെങ്കില്‍, സർവതും കേന്ദ്രീകൃതമാക്കാനുള്ള ശ്രമമാണ്​ ദേശീയ വിദ്യാഭ്യാസ നയരേഖയില്‍ കാണുന്നത്​. തീരുമാനങ്ങള്‍ കൈക്കൊള്ളുന്ന കാര്യത്തില്‍ അധ്യാപകര്‍ക്കും അക്കാദമിക സമൂഹത്തിനുമുള്ള പങ്ക് പരിമിതപ്പെടുത്തുന്ന രേഖ, ജനാധിപത്യ സ്വഭാവമുള്ള സ്​റ്റാറ്റ്യൂട്ടറി സമിതികള്‍ക്കുപകരം കോര്‍പറേറ്റ് ശൈലിയിലുള്ള ഭരണ സംവിധാനമാണ് ശിപാര്‍ശ ചെയ്യുന്നത്. സമത്വം, സാമൂഹികനീതി, അക്കാദമിക പ്രതിബദ്ധത തുടങ്ങിയവയെ ഈ സമീപനം പ്രതികൂലമായി ബാധിക്കുമെന്നും അദ്ദേഹം അഭിപ്രായപ്പെട്ടു. പ്രഫ. പ്രഭാത് പട്​നായക്​ അധ്യക്ഷനായ സമിതിയിൽ പ്രഫ. രാജന്‍ ഗുരുക്കള്‍ (വൈസ് ചെയര്‍മാന്‍, കെ.എസ്.എച്ച്.സി), ഡോ. ഗംഗന്‍ പ്രതാപ് (എന്‍.ഐ.ഐ.എസ്.ടി), പ്രഫ. കെ. സച്ചിദാനന്ദന്‍, ഡോ. കുംകും റോയ് (ജെ.എന്‍.യു), ഡോ. രാജന്‍ വറുഗീസ് (മെംബര്‍ സെക്രട്ടറി, കെ.എസ്.എച്ച്.സി) എന്നിവർ അംഗങ്ങളാണ്​.