നാമനിർദേശ പത്രിക സമർപ്പണം ഇന്നുമുതൽ

* തിരക്കുണ്ടാക്കരുത്, വാഹന വ്യൂഹവും ജാഥയും പാടില്ല * പത്രിക സമർപ്പണത്തിന്​ സ്ഥാനാർഥിയടക്കം മൂന്നുപേർ മാത്രം * ഒരുസമയം ഒരു സ്ഥാനാർഥിയെ മാത്രമേ പ്രവേശിപ്പിക്കൂ തിരുവനന്തപുരം: തദ്ദേശ സ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പിനുള്ള നാമനിർദേശ പത്രികകൾ വ്യാഴാഴ്ച മുതൽ സ്വീകരിക്കും. സംസ്ഥാന തെരഞ്ഞെടുപ്പ് കമീഷണർ തെരഞ്ഞെടുപ്പ് വിജ്ഞാപനം പുറപ്പെടുവിക്കുന്നതോടെ വരണാധികാരികൾ ഇത്​ പരസ്യപ്പെടുത്തും. തുടർന്നാണ്​ പത്രികകൾ സ്വീകരിച്ച്​ തുടങ്ങുന്നത്. കോവിഡ് മഹാമാരിയുടെ പശ്ചാത്തലത്തിൽ കർശന കോവിഡ് മാനദണ്ഡങ്ങൾ പാലിച്ചാകും പത്രിക സ്വീകരണത്തി​ൻെറ നടപടിക്രമങ്ങൾ. 19 വരെയുള്ള പ്രവൃത്തി ദിനങ്ങളിൽ രാവിലെ 11 മുതൽ വൈകീട്ട് മൂന്നുവരെയാണു പത്രികകൾ സ്വീകരിക്കുന്നത്. സ്ഥാനാർഥിയടക്കം മൂന്നുപേരെ മാത്രമേ വരണാധികാരിയുടെ ഓഫിസിലേക്ക്​ പ്രവേശിപ്പിക്കൂ എന്ന്​ ജില്ല തെരഞ്ഞെടുപ്പ് ഓഫിസർ കൂടിയായ കലക്ടർ ഡോ. നവ്‌ജ്യോത് ഖോസ അറിയിച്ചു. നോമിനേഷൻ ഹാളിൽ പ്രവേശിക്കുന്നതിന്​ മുമ്പ്​ നിർബന്ധമായും കൈ സോപ്പ് ഉപയോഗിച്ച്​ കഴുകുകയോ സാനിറ്റൈസ് ചെയ്യുകയോ വേണം. എല്ലാവർക്കും മാസ്‌കും നിർബന്ധമാണ്. സാമൂഹിക അകലം പാലിക്കുകയും വേണം. നോമിനേഷൻ സമർപ്പിക്കാനെത്തുമ്പോൾ സ്ഥാനാർഥിക്ക് ഒരു വാഹനം മാത്രമേ പാടുള്ളൂ. ആൾക്കൂട്ടമോ വാഹന വ്യൂഹമോ ജാഥയോ അനുവദിക്കില്ല. കണ്ടെയ്ൻമൻെറ്​ സോണിലുള്ളവരോ ക്വാറൻറീനിൽ കഴിയുന്നവരോ ആണെങ്കിൽ റിട്ടേണിങ് ഓഫിസറെ മുൻകൂട്ടി അറിയിക്കണം. സ്ഥാനാർഥി കോവിഡ് പോസിറ്റീവോ നിരീക്ഷണത്തിലോ ആണെങ്കിൽ നിർദേശകൻ മുഖേന നാമനിർദേശ പത്രിക സമർപ്പിക്കാം. തെരഞ്ഞെടുപ്പ് കമീഷൻ അധികാരപ്പെടുത്തിയ ഉദ്യോഗസ്ഥൻ മുമ്പാകെ സ്ഥാനാർഥി സത്യപ്രതിജ്ഞ ചെയ്ത് ഒപ്പ്​ രേഖപ്പെടുത്തണം. തുടർന്ന്​ സത്യപ്രതിജ്ഞ രേഖ റിട്ടേണിങ് ഓഫിസർക്ക്​ ഹാജരാക്കണം. പത്രികകൾ സ്വീകരിക്കുന്ന വരണാധികാരികൾക്കും കോവിഡ് പ്രോട്ടോകോൾ നിർദേശങ്ങൾ നൽകിയിട്ടുണ്ട്. റിട്ടേണിങ് ഓഫിസർമാർ നിർബന്ധമായും മാസ്‌ക്, കൈയുറ, ഫെയ്‌സ് ഷീൽഡ് എന്നിവ ധരിച്ചിരിക്കണം. ഓരോ നോമിനേഷനും സ്വീകരിച്ചശേഷം സാനിറ്റൈസർ ഉപയോഗിക്കണമെന്നും കലക്ടർ നിർദേശം നൽകി. ഉദ്യോഗസ്ഥർക്ക്​ പരിശീലനം തദ്ദേശ സ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പിൽ പോളിങ് ഉദ്യോഗസ്ഥർക്കുള്ള പരിശീലനത്തിന്​ നിയോഗിക്കപ്പെട്ട ബ്ലോക്ക്തല റിസോഴ്‌സസ് പേഴ്‌സൺമാർക്ക് ഏകദിന പരിശീലനം സംഘടിപ്പിച്ചു. ഇലക്ഷൻ ഡെപ്യൂട്ടി കലക്ടർ ജോൺ സാമുവൽ പരിശീലനം ഉദ്ഘാടനം ചെയ്തു. കലക്ടറേറ്റ് കോൺഫറൻസ് ഹാളിൽ നടന്ന പരിശീലനത്തിൽ 45 ഉദ്യോഗസ്ഥർ പങ്കെടുത്തു.