സി.എസ്.ബി ബാങ്കിൽ കൂട്ട പിരിച്ചുവിടലിന് നീക്കം; പ്രതിഷേധം ശക്തം

തൃശൂർ: സി.എസ്.ബി ബാങ്കിൽ (പഴയ കാത്തലിക് സിറിയൻ ബാങ്ക്) കാൽ നൂറ്റാണ്ടും അതിലധികവും സേവനപരിചയമുള്ള ജീവനക്കാരെ ‌കൂട്ടത്തോടെ പിരിച്ചുവിടാൻ നീക്കം. നിരവധി പേർക്ക് മാനേജ്മൻെറ്​ നോട്ടീസ് നൽകി. സബ് സ്​റ്റാഫിൽനിന്ന് യോഗ്യത പരീക്ഷയുടെയും അഭിമുഖത്തി​ൻെറയും അടിസ്ഥാനത്തിൽ ക്ലറിക്കൽ തസ്​തികയിലേക്ക് ഉയർത്തപ്പെട്ട് സംസ്ഥാനത്തിനകത്തും പുറത്തുമുള്ള ശാഖകളിൽ ജോലി ചെയ്യുന്നവർക്ക് നേരെയാണ് മാനേജ്മൻെറ് വാളോങ്ങിയിരിക്കുന്നത്. മുൻകൂർ അറിയിപ്പില്ലാതെ ക്ലസ്​റ്റർ ഹെഡ് ലാപ്ടോപ്പുമായി ക്ലർക്കുമാരെ സമീപിച്ച് ചില ജോലികൾ ചെയ്യാൻ ആവശ്യപ്പെടുകയാണ്. 10 ജോലികളാണ് ഏൽപിക്കുന്നത്. നിശ്ചിതസമയത്ത് അത് പൂർത്തിയാക്കിയില്ലെന്ന കാരണം പറഞ്ഞാണ് പിന്നീട് നോട്ടീസ് നൽകുന്നത്. കമ്പ്യൂട്ടറിലെ തകരാറോ സെർവർ പ്രശ്​നമോ കണക്കിലെടുക്കില്ല. ഒളികാമറയുടെ സഹായത്തോടെ ‌പരീക്ഷ നടത്തിയാണ് പരിച്ചുവിടൽ നോട്ടീസ് നൽകിയതെന്ന് സി.എസ്.ബി സ്​റ്റാഫ് ഫെഡറേഷൻ (ബെഫി) ആരോപിച്ചു. ഇത്തരത്തിൽ രഹസ്യമായി പരീക്ഷ നടത്തി പ്രവർത്തനമികവ് തെളിയിക്കാൻ ജീവനക്കാരുടെ സേവന-വേതന കരാർ പ്രകാരം മനേജ്മൻെറിന് അവകാശമില്ല. നടപടി പിൻവലിക്കണമെന്ന് ആവശ്യപ്പെട്ട് സി.എസ്.ബി സോണൽ ഓഫിസുകൾക്ക് മുന്നിൽ ബുധനാഴ്​ച ധർണ നടത്തുമെന്ന് ബെഫി സംസ്ഥാന കമ്മിറ്റി അറിയിച്ചു. പ്രതിഷേധ സൂചകമായി ചൊവ്വാഴ്​ച തൃശൂരിലെ ബാങ്ക് ഹെഡ് ഓഫിസിന് മുന്നിൽ നടന്ന ധർണ ബെഫി സംസ്ഥാന പ്രസിഡൻറ്​ ടി. നരേന്ദ്രൻ ഉദ്ഘാടനം ചെയ്​തു. തൃശൂർ ജില്ല സെക്രട്ടറി രജിതമോൾ, സംസ്ഥാന കമ്മിറ്റി അംഗങ്ങളായ സുമ ഹർഷൻ, വിപിൻബാബു എന്നിവർ സംസാരിച്ചു. സ്​റ്റാഫ് ജനറൽ സെക്രട്ടറി ജെറിൻ കെ. ജോൺ സ്വാഗതവും പ്രസിഡൻറ്​ സി.എ. മോഹൻ നന്ദിയും പറഞ്ഞു.