തദ്ദേശ തെരഞ്ഞെടുപ്പ്​: പാളയത്തിൽപടയും വിഴുപ്പലക്കലും തകൃതി

അമ്പലത്തറ: സീറ്റുകള്‍ ഉറപ്പിച്ച സ്ഥാനാർഥികള്‍ കണ്‍വെന്‍ഷനുകള്‍ വിളിച്ചുചേര്‍ത്തതോടെ മുന്നണിവ്യത്യാസമില്ലാതെ പാർട്ടികളിൽ പ്രവർത്തകർ പരസ്പരം ചളിവാരി എറിയലും വാക്​പയറ്റും തുടങ്ങി. കണ്‍വെന്‍ഷനുകളില്‍ സീറ്റ് മോഹിച്ച് കിട്ടാത്ത നേതാക്കളും അവര്‍ക്ക് പിന്‍തുണയുമായി എത്തുന്നവരുമാണ്​ എതിരാളികളെ വ്യക്തിഹത്യ നടത്തുന്നത്. ചിലയിടത്ത്​ പ്രഖ്യാപനം വരുംമുമ്പ് നവമാധ്യങ്ങള്‍ വഴി സ്വയം സ്ഥാനാർഥി ചമഞ്ഞ്​ പോസ്​റ്ററുകള്‍ ഇട്ടവർക്കെതിരെ കടുത്ത പ്രതികരണങ്ങളാണ് ഉണ്ടാകുന്നത്. മുതിര്‍ന്ന നേതാക്കള്‍ ഇടപെട്ട്​ തല്‍ക്കാലം അയവ് വരുത്തുന്നു​െണ്ടങ്കിലും വരും ദിവസങ്ങളില്‍ വാക്​പയറ്റും പാരവെപ്പും സജീവമാകാനാണ്​ സാധ്യത. കഴിഞ്ഞദിവസം ബീമാപള്ളിയില്‍ നടന്ന നഗരസഭ ലൈഫ്മിഷന്‍ പദ്ധതിയുടെ ഉദ്ഘാടന ചടങ്ങില്‍ മുസ്​ലിം ലീഗിലെ രണ്ട് കൗണ്‍സിലര്‍മാര്‍ തമ്മിൽ വെല്ലുവിളി നടത്തി. ഇതോടെ പ്രവര്‍ത്തകരും രണ്ട് ചേരിയായി. വരാന്‍പോകുന്ന തെരഞ്ഞടുപ്പില്‍ ഇവര്‍ രണ്ടുപേരും മത്സരരംഗത്തുണ്ട്. എതിരാളിയുടെ അതേപേരുള്ള അപരന്മാരെ തേടിയുള്ള ഓട്ടത്തിലാണി​പ്പോൾ. ഇത്തവണ പ്രചാരണത്തിന് കടുത്ത നിയന്ത്രണങ്ങള്‍ ഉ​െണ്ടങ്കിലും അവ മുഖവിലക്ക് എടുക്കാതെയുള്ള പ്രവര്‍ത്തനങ്ങളാണ് പലയിടത്തും നടക്കുന്നത്​. വാര്‍ഡ്​ കണ്‍വെന്‍ഷനുകളില്‍ നൂറിലധികം പേരാണ് പങ്കെടുക്കുന്നത്.