കൂടം തറവാട്ടിലെ ദുരൂഹ മരണങ്ങൾ: സ്വത്ത്​ കൈമാറ്റത്തിന് സ്​റ്റോപ് മെമ്മോ

തിരുവനന്തപുരം: കൂടം തറവാട്ടിലെ ദുരൂഹ മരണങ്ങള്‍ സംബന്ധിച്ച കേസില്‍ നിര്‍ണായക നീക്കവുമായി കൈംബ്രാഞ്ച്. രണ്ടാംഘട്ട ചോദ്യംചെയ്യലിന് തയാറെടുക്കുകയാണ് സംഘം. ആദ്യവട്ട ചോദ്യംചെയ്യലില്‍ സംശയമുള്ളവരെയും സാക്ഷിപട്ടികയില്‍ ഉള്‍പ്പെടുത്താന്‍ തീരുമാനിച്ചവരില്‍ ചിലരെയുമാണ് വിളിപ്പിക്കുക. കൂടത്തില്‍ തറവാടിൻെറ സ്വത്തുക്കള്‍ കൈമാറ്റം ചെയ്യുന്നത് തടയാനും നിര്‍മാണ പ്രവര്‍ത്തനങ്ങള്‍ നിര്‍ത്തിവെക്കാനുമുള്ള നടപടി നഗരസഭ ആരംഭിച്ചു. ക്രൈംബ്രാഞ്ചി​ൻെറ ആവശ്യപ്രകാരമാണിത്. തറവാടിന് അടുത്തുള്ള വാണിജ്യകെട്ടിടത്തിനും വീടിനും നേമം സോണല്‍ ഓഫിസ് ഉദ്യോഗസ്ഥര്‍ സ്​റ്റോപ് മെമ്മോ നല്‍കി. ഇവിടുത്തെ നിര്‍മാണ പ്രവര്‍ത്തനങ്ങള്‍ നിര്‍ത്താനും വീടിന് നല്‍കിയ ടി.സി നമ്പര്‍ റദ്ദാക്കാനും നടപടി തുടങ്ങി. മണക്കാട്, തൈക്കാട്, പേട്ട, നേമം വില്ലേജുകളിലായി കൂടത്തില്‍ തറവാടി​ൻെറ ഭാഗമായിരുന്ന വസ്തുവകകളുടെ വിവരം ശേഖരിക്കാനും ആരംഭിച്ചു. തറവാട്ടിലെ ഏഴുപേരുടെ ദുരൂഹ സാഹചര്യത്തിലുള്ള മരണങ്ങള്‍ കൊലപാതകമാണെന്നും കോടിക്കണക്കിന്​ രൂപയുടെ സ്വത്തുക്കള്‍ കാര്യസ്ഥന്‍ ഉള്‍പ്പെടെയുള്ളവര്‍ കൈവശപ്പെടുത്തിയെന്നുമാണ് പരാതി.